Ṭek in nauhak pahnih tlak that, nauhak dang minung 4 in hliamtuar

Tuisun (September 29) zanlam nazi 3 hrawngah Chinram Matupi pengih Ṭingsi khua le Yasaw khua ah ṭeek nasa takin a tlak ruangah tlawngta nauhak pahnih an thi ih a dang nauhak minung 4 in hliam an tuar tiah thuthang theih a si.

 

Ṭingsi khua nauhak ṭeek ih tlakthat mi hi tlawng phun sarih kai lai Salai Van Za Thang a si ih hliamtuartu minung 4 pawl cu, tlawng phun hnih ihsin phun ruk karlak kai lai hrawng an si. Ṭingsi khaw kiang Yasaw khua ih nauhak pakhat khal hi ṭeek tlaknak ruangah a thi ve.

 

Hi thil a candan cu, nauhakpawl tlawng an kai lai, zanlam deuh ah tlawng hmai ah bawhlung an sit ih, an bawhlungsit rero lai ah ruahpi a sur ciamco. Cutin ruah a sur ruangah tlawnginn varenda ah an beu ih, an tlawng hmai thantar ban kiangte ih bawhlung cu Salai Van Za Thang in va sar dingin a va feh laifang ah ṭeek a tla ciamco mi a si.

 

Hliamtuar tu nauhak dangpawl cu tufang ah sikhan ah tuamhlawm rero lai an si ih an dinhmun a ṭha ih lungphan tuk ding cu a si lo, tiah thuthang theih a si. Zalen