A fapa pathai (gay) a si le silo hniksaktu Pacang pakhat

U.S ram ih um pacang pakhat cun a fapa cu pathai (gay) a si ding a ringhlel deuh ruangah thinhar zetin a um ih, YouTube channel pakhat hnen ah bawmnak dilin a fapa cu pathai (gay) a si le silo theih duh ah a hniksak ta riai. Tulai kan san tak hi cu aw.. mai’ fate rori hman nunsim ngam a sinawnlo, an duhduh ih um theinak an nei fawn, Nulepa tampi thin cu a zun duahdo ko.

Hi YouTube Channel hi fala tlangval duhaw laimi a rinum le rinumlo hniksaknak tipawl, nupi/pasal an rinum taktak maw tipawl hniksaknak hrang liolio ih tuahmi a si. Asinan hi pacang pa hin a fapa hrang a ruat tuk ruangah anih cun a nupi a rinum le rinumlo lam sisawn loin a fapa pathai (gay) a si le silo sawn a hniksak a si cu.

A fapa lamleng lai cu fala pakhat an fial thup ih an kiangah Camera an ret thup, cutin fala cun tlangval cu cakhiarnak a neih le neih lo hniksak in a phunphun in a bia, tlangval cun fala a neih dahlo thupawl a sim. Cutin fala cun keimai’ hnen ah ra riak aw a tiih, a thlimthluai hnu ah tlangval cun a rak lungkim ve. Cui’ an biakawk lai pawl cu inn sung ihsin TV thawn a Pa cun a rak zoh ringring. A fapa pathai (gay) a si lo ti theifiangtu a pa cu a lungawi tukah um ngaihnak khal a thei lo.

Hivekin Pa in a fapa cu pathai (gay) a si ding rinhlel deuh ruangih hivek a tuahmi parah mi tampi in an sawisel ciamco. Mi ṭhen vethung cun a pa an uar ih an fak zet fawn. Nangteh a Pa hi mawh na ti maw, na uar sawn?