A Thlengaw Rero mi Leitlun ah (Chinland Quo Vadis)

Image: The Earth Holocracy Proposal

A thlengaw rero mi leitlun ah minung kan tam sinsin, ramkulh a pung sinsin, ukawkdan a phunphun khal a suak vivo ih tuini tingah ukawkdan tha bik cu democracy hi a si hrih. Asinan, Hnam damnak le zalennak pe theitu le thlenter theitu lamzin umsun cu a si lo. Hnamdang kut ihsin Chin pawl in suakter thei tu a si kherkher fawn lo.

 

Curuangah, Burma ramkulh in democracy a hmuh ruangah Chinram in zalennak le hnam damnak a hmuh phah ding kan ti theilo.

 

HNAM DAMNAK kan timi cu ramdang mi hnamdangpawl thuneihnak hnuai ihsin suakin zalen zetin kan ram le miphun tlunah thuneihnak sang bik kan neih hi a si. Burma ramkulh in democracy a hmuh a si khalle Chinpawl cu Kawl thuneihnak hnuaiih kan um lai thotho ahcun, cucu hnam damnak kan ti theilo. Democracy hmuh ruangah ei in le sumpai khal khawpkham zetin kan hmuhphah thei men, lennak le nawmnak a phunphun khal kan tawn phah thei fawn.

 

Asinan, ram pakhat neitu phunhnam pakhat hrang ah ei in le sumpai lamih nawmnak hmuh men hi hnam damnak tling a si hrimhrim lo. Kan ram le kan miphun tlunih thuneitu ding cu kanmah lawnglawng kan siih kan tlun ahcun Pathian lawmg a um. Pathian le kan karlakah hnamdang mi an um ih kan tlunih lai an rel kulh sung cu democracy maw, communism maw, socialism maw, ziangvek ukawkdan khal hmang sehla kan hrangah umzia a nei lo, hlawknak a um taktak lo, lungawinak tlak a silo, hnam damnak tling tla cu a si thei lo, ziangahtile, zalennak taktak puanzar hnuai lawngah hnam damnak cu co theih a si, hlawknak ngaingai khal a hmuh theih ih lungawinak taktak khal tawn theih a si.

 

Democracy thu kan rel tikah ziangvek democracy (direct or indirect) deuh hi kanram in a mamawh ti kan theihfiang hmaisak a tul. Cuihnu ah, ziangvek roreldan (constitution) kan hmang ding ti theihfiang a tul lala fawn. Thimnakah, mipum tam zetnak ram ahcun direct democracy hnakin indirect democracy hi hman a awl sawnnak a um thei.

 

Curuangah, kan ram le minung zoh in ziangvek democracy deuh kan mamawh ti theih ding a si. A hleice in miphun dangdang um khawmnak ramkulh (Burma tivek) ahcun ziangvek democracy ti hnak hmanin ziangvek constitution kan nei ih kan hmang tihi a thupit deuhnak lai a um. Ziangahtile, ramkulh pakhat sungih hnamtin citin pawl ziangtivekin umkhawm, ziangtivekin rorel ih ziangtivekin kaihhruaiawk ding a si ti cu hi constitution ih ngan mi vekin fehpi a si.

 

Thimnakah, 1948-1962 sung kum 10 lenglo Burma ramkulh in democracy (indirect) hmangin kan rak um nan, constitution sungah mipum mal deuh a simi Chin, Kachin tivekpawl cun hamthatnak le thuneihnak nei thei dingin constitution ngantu Kawl pawlin an rak ngan duh lo tikah, democracy dan lala hmangin mipum tam deuh Kawlpawl cun duhduhin in uk bet theiih mai khua le ram tlun hmanah thunei theilo in kan um thotho.

 

Mipum ih an tamsawnnak cu thei ringring in Kawlpawl cun “mi tamsawn thuneih theinak” democracy cu thiam zet le hrawkhrawl zetin an hmangih mi malsawn kannih Chin, Kachin tipawl cu Caw hnar vih mi bangin an duhduh nakah in rak hruai. Ramkulh thu ih thutawp relnak hmun palimen ah siseh, State tin ih thuneihnak ah siseh, mi malsawn tlangparmi pawl cu cang theilo dingin constitution ah ngan a siih, hihin kannihpawl cu ke nei cing nan feh theilo, mit nei cing nan hmu theilo le ka nei cing nan tawng theilo ah in can ter.

 

Curuangah, kan diknak le zalennak pawl cu constitution sungah humhim ih ngan a silo ahcun, democracy cu mipum mal deuh pawl mipum tam deuh hnamdang kut sungih lutternak sangka vekah a cang thei.

 

Kan ram in zalennak diktak a hmuh hnu ahcun, kanmah le kanmah ukawknakah kan ram le minung ih zirin ziangvek democracy, lole, ukawkdan dangdang khal kan hmang thei. Cutik can tiangah democracy hnakih ukawkdan tha hmuhsuah a silo ahcun democracy hi kan hril ding tlak a si.

 

Asinan, tuini tuican ah kannih Chinpawl hrangih a thupi bik cu democracy hmuh hi si loin zalennak diktak le hnam damnak hmuh hi a si sawn.