A Zanriah ei dingmi a fale pawlin an rak ei sak ruangah Tisa thawn a burh

Minung hi kan va rak bangawlo cio tak em. Mi ṭhen cun an mai’ ei ding ai rori ei sianglo in an fale sawn an pe ih an ei ter, mi ṭhen tla cun an kaa sungta rori hman phawrhsuak in an fale an pe ṭheu. Fale duhdawtnak a nat zia. Mi tam sawn PA le cun fate pawl cu an duhdawt in an ngaihsak, an rilrawn tihal ding an sianglo sawn lam.

GEORGE TOWN (Bernama): Tuizing, January 1, 2019 zingah, Pacang pakhat cun a zanriah ei dingmi a falepawl in an rak ei sak ṭheh ruangah a thinheng tuk tuar loin a fale pawl cu nasa takin a vuakih a velh hnu ah, a fanu upa bik cu zangfahnak sete hman nei loin Tisa thawn a fanu cu a theh rumro mei.

Malaysia ram Pinang ih um, Phone topup zuar ṭheu, pacang pakhat cu, sun hna a ṭuannak ihsin zinglam nazi 1am hrawngah inn a ra thlengih, rilrawng zetin zanriah ei ding a vun hawl nan, zianghman ei ding a hmu lo, a Nupi in a zanriah hrangih a rak timtuahmi ti-rawl cu a fale pawl in an rak ei sak ṭheh. Pacang pa cu a rilrawng thawn a thinheng supaw theilo in a fale pawl cu an itthat nak ihsin a ṭhang hai ih nasa takin a kok ih a vuak hai.

Leh hnu deuh ah a thinheng dai thei cuanglo in a um ih a fanu upa bik cu Tisa thawn a theh ta riai. Hivekin an Pa bik rapthlak zetih a cangvaih pawl hi a nupi le a fate pawl lawngin an hmu ih zohman khamtu khal an um lo. Cutin a fate parah rapthlak zetih a cangvaih hnu ah palik ih kaih ṭih in a nupi le fate nauta bik thawn hmun dangah an tlan ih an fale dang cu an Pi tei’ inn ah an um.

Tisa a burh mi a fate cu Tisa ih a kangnak ruangah a baan, a hnak le a awm pawl ah tisa ih kangnak hliam a tuar nasa tiah an sim. A pa cun a ei dingmi rawl a eisak ruangih tisa a burh mi a silo, RM10 I ruksak ruangih burh a si tiah a sim nan, a taktak cu RM10 a ruk ruangih tisa burh siloin a zanriah ei dingmi a rak ei sak ruangih burh sawn a si tiah, palik bawi in a sim.

Hi thu thawn pehpar in Timur Laut Palik bawi, ACP Che Zaimani Che Awang cun tu-ah hi pacang pa hi hawl rero lai a si ih, tu hrih mei ahcun khui tawkah an tlan timi kan theifiang hrih lo tiah a sim.