Buddish phungki 100 rual le Catholic hotupawl Kalaymyo ah Pre Christmas hmang tlang

Kan khawvel san ling a let thluh ih kan Chin miphun hrekkhat khal santiluan ih zirin kan ling a rak let ve a si hi. Tuihlan ih um dah kello mi thil thar tete tla kan Chinmi lak ihsin theih ding a um vivo thlang. Kan dungte ah Zomi sungih Catholic pawlkom pakhat cun Myanmar ralkap baw Min Aung Hlaing hnen ah “Chin Paralṭha” sunlawihnak lawmman an rak pe dah.

Tuiṭum khal hi kan Chin thuanthu ahcun a um dah kellomi a si. Tuisun, December 21, 2018 ah Chinrawn/Lairawn (Kalaymyo) ih Roman Catholic Biakinn hall pi ah Catholic hotupawl le mipipawl siseh Buddish phungki minung 100 rual lai cu Christmas puai an hmang tlang tiah thuthang theih a si.

Zukih kan hmuh bang hin mipi a ra suakkhawmtu khal an ṭhahnem zetih phungki pawl stage parih an to thliangthliang lai, an tlun zawn ah Merry Christmas timi Catar (banner) pi khal an tar demdem. Rundamtu Jesu ih suahcam kan lawm dan hi a dangdai ve cio. Mi ṭhen in nawmnak phunphun thawn an hmang, mi ṭhen in sualralnak ah an hmang, mi ṭhen in biaknak pakhat le pakhat rualremnak ah an hmang.

Tuiṭum ih Kawl Phungki 100 rual lai le Kalaymyo ih Catholic (Chinmi) pawl Christmas an hmangtlang timi hi ziang tumtahnak thawn, ziang duhsan in an hmang tlang timi cu theihfeng a si lo. Ruah dingmi cu Phungki 100 rual pawl thawn Christmas hmantlang timi hi Pathian ih duhdan le lungawi zawng teh a si pei maw? Zalen