Chin Mi Kan Lungput le Cozah Par Ah Pu No Than Kap in A Hmuh Dan A Rel

Pu No Than Kap cun 2020 rampi hrilawknak ah tu ih cozah ṭuanlai NLD party hnak cun 100% in an party CNLD in hna a ṭuan thei sawn ding thu a sim. A thu sim mi hi ṭha ten hun siar aw la, a dik na ti ve zet ding tiah k zum. Cun, a umnak party na si lo ruangah na do hrim hrim tla a si men thei. A thu rel hi a zatein a dik riai, kan ti lo hmanah, a hlei cein kan Laitlang minung pawl um tu dan le lungput cu a rel fiang tuk ko tiah a ruah theih.

Pu No Than Kap cun Chin mi senpi lungput a rel ih, “Chin mi pawl hi cun lam zin, lilawn, meisa le minungih lo theih lo ih kan ṭulsammi pawl (basic needs) lawng an zoh,” a ti. Hiang pawl – lamzin, meisa, etc cozah in a ṭuan pawl thuhla thawn hi tin a rel peh, “Hiang pawl tla hi cu zoi party kha hung tling sehla an ṭuan thei thluh ko si si. An ṭuan ding hrim hrim kha a si,” a ti. A rel dan hun ruah hin NLD lamin khua le ram ṭhansonak kan tuah an ti ṭheu le an hnaṭuan thei ri hi cu zoi party khalin an ṭuan thei ding le, an ṭuan ding hrim hrim a si, curuangah tu tiangah hin ram le miphun ṭhansonak ngai ngai cu an ṭuan hrih lo, a ti duhsan a bang zet. A si tla a si men thei. Kan party kan tlin cun hi hnakih kau deuh le nasa deuhin hna kan ṭuan ding, a ti.

NLD cozah sungah eithupnak a tam tuk ti cu a mah No Than Kap lo khalin, a zo poh pohin an rel ce ce cu a si i. Hi thuhla thawi’ pehpar aw in hi tin a rel, “Khua le ram duhdawt ngai ngaitu pawlin hna an ṭuan ahcun ziang tik hmanah nawh thuh tivek hi a um ka zum lo. Tu ih cozah sanah hi cun, contractor hmin siatnak rak nei zo ṭhenkhat kha leh hnuah hna dang ṭha ṭha an hun hmu sal la la. Contractor milian le thil tithei, mai party rak dinpi, etc hmai song an bang ih, cu vek cing cun mai khua le ram, mai peng le ramkulh hrang ṭulsam mi hun ṭuan cu a har tuk. A ti theih loh,” a ti.

Pu No Than Kap cun, “Cozah kan tuah cun kan calai le hnam nunphung zirnak kan hun uar ding,” a ti. Hun ruah hin hi hi thil ṭul tak a si ngai, tiah a ruah theih. Tui kan dinhmunah hin mai ṭong zir theih tiin cozah pi lamin hun ti kha sehla, kan lai tlang hmun tinih tlawng pawl hun zoh hin Lai ca zirnak lamah an hnufual zet, an zir lo tluk a si, a ti theih. Pu No Than Kap cun, “Kan hnam nunphung a hlo rero ih, hnam dang (Kawl) nunphung in in ciah neh tum vivo. Tahthimnakah hlan lai ih si ‘pi pu ro’ kan ti vek pawl tla hi. Kan mai phunhnam hrang daan kan rak neih ṭheumi kha a um nawn lo,” a ti. Tu naiah khan Hakha khawpi kauhnak thuhlaah cozah le leiram neitu pawl an buai. Cozahin an in sakmi pawl a ṭhiatbal sak. In saktu tam sawn cun hlan lai ihsi kan pi pu leiram a si, an ti. Kha vek thu hla kha Pu No Than Kap hin a rel duhmi a si pei maw?

Party pakhat a din cun cui party cun din san, tumtahmi a neih teng teng a ṭul. NLD party hin tu tiangah, hlan ihsi an vote hawlnak bik Daan hrampi rem ding kha, an tuah thei hrih lo cu si khaw! Kawl rawn lam, Kawl pawl tamnak ab cun NLD cu rak um ko seh. Laitlang, Chin State cozah tuahtu, Laitlang ih NLD pawl hin tumtah kha an nei ngut lo maw si, tiding hrawng cun thil a um ngai – a hran ih ṭhansonak lam hi kan nei hrih lo ngai.

Hi thu thawn pehpar aw in Pu No Than Kap cun an party dinsan muril pakhat a rel peh ih, “Kan nih Chin party pawl hi cun midang tuah cia daan le dun parih va um ve mai kha kan tum mi a si lo. Kan phun hnam, kan ram thawi’ mil aw ding phung le daan kan ser a ṭul. Cui kan phunhnam thawi mil aw ih kan sermi daan le dun pawl tuah suak ih a tak roriih hmang dingin party kan cangvai a si,” a ti.

Tu tiang ah hin Chin National League for Democracy (CNLD) hin Paletwa myo-ne ti lo, Chin State myo-ne hmuah hmuahah party zung an phuan thluh thlang. Chin phunhnam pawl um tamnak Kalay-Kabaw valley tluan, Kaleymyo, Tamu le Gango lam tiangin zung an phuan thu theih a si.

Ref : chinworld

Be the first to comment

Leave a Reply

Your email address will not be published.


*