Chin State U-12 Club le Magwe Club Semi-Final an nuaiaw ciamco thlang ding

Myanmar ramsung ih Ramṭhen pawl zatekawm khawm ih Football lek zuamawknak ah Chinram aiawh ih a lektu U-12 Club cu Karen ramṭhen thawn an sitawknak ah 3-1 in nehnak an co (goal 2 in an neh) ta riai. Karen club thawn quarter final an lekawknak ah Chin Club U-12 in nehnak an co vekin Semi-final lut ding an si ih, Semifinal ah hin Magwe ramṭhen thawn lekaw ding an si.

Hi Myanmar ramsung football lek zuamawknak hi Myanmar Football Association le Fimthiamnak lam vuanzizung kawmkhawmaw ih tawlrelmi a si ih National Football Academy bualrawn ah an lekmi a si.

U-12 Club

Chin Club U-12 hi an Coach cu U Ki Ling a si ih amai’ kaihhruainak in Chin Club U-12 hin Kachin ramṭhen cu 3-1 in le, Mandalay ramṭhen 2-0, Yangon ramṭhen 3-1, Karen ramṭhen 3-1 tiin nehnak an co a si. Chinram aiawh ih a lektu U-12 club pawl hi Mindat pengṭhen ihsi a lektu Chin mino rual an si, tiah theih a si.

Semifinal hi December 12 simlam nazi 4:00pm ah Magwe ramṭhen le Chinram aiawhtu U-12 pawl doaw ding an si ih, Thu-Wa-Nah bualrawn ah lek ding an si. Final cu December 14 simlam nazi 4:00pm ah Thu-Wa-Nah bualrawn thotho ah lek a si ding.

Semifinal tiang rori a thleng theitu U-12 Club pawl hi Chinland FC le Chin United FC ih ṭuanvo neitupawl khalin thape in an lawmpi zet thu theih a si. Zalen.