CHINLAND QUO VADIS? (Chinram Khui Na Feh Ding) Part 5

Chin People. Image - Wikipedia

Kan pipu san ihsin 1948 tiangah Mirangpawl siarlo ramdang le hnamdang mi zovek hman in Chinram cu an do neh dahlo, an uk fawn lo. Kan kiangkap nai bik ih um KAWL pawlin siseh, KALA pawlin siseh, ZAKHAING pawlin siseh, Chinram cu ukin an thuneihnak hnuaiah vei khatte hman an rak ret dah lo. KAWLpawl siseh, KALApawl siseh, ZAKHAINGpawl in siseh anmahte uktu siangpahrang neiin an rak um cio ih cui an siangpahrangpawl kut hnuaiah Chin le miphun cu an rak um dah lo. Chinram neitu le uktu cu anmah Chinmi an rak si ringring.

 

Kum 50 lenglo Mirangpawl ih in uk sungah a nung mi Pathian kan theih phah, leitlun dan le nuntudan a phunphun kan thei kan hmuh phah in ziangmawcin kan nunpi thei phah fawn. Hitivekin nuntudan ah thlengawknak le thansohnak kan rak nei nan thuneitubik siloin hnamdang Mirang thuneihnak hnuaiih nung kan rak si ruangah Chinpawl cu minung pumhlum siloin minung hrek tluk fang kan rak siih zalennak ngaingai nei lo “sâl” kan rak si.

 

Leitlun ralpi (Second World war) a rung thleng ih Mirang kumpi hnuai ih um ram tampi in zalennak hmu dingin tan an la. Kawlpawl khalin Gen. Aung San kaihhruainak in an ram zalennak dingah hriamhrei thawn siseh, a nem zawngin siseh a phunphun in hna an rak tuan ve. Ralpi veihnihnak a cem tikah a ukmi ram pawl cu zalennak pe dingin Mirang kumpi cu a timlam aw. Mirang kumpi cun Chinram cu March 3,1936 ah “telhlo ram (excluded area)” ti’n India le Burma khalah telhlo dingin an rak puan cia ruangah India le Burma zalennak  (Independence) a pek tik khalah Chinram cu a mahte zalennak hmu ve dingin a duhsak a bang.

 

Asinan, thlanglam-Chinram (Lusei Hills) ih um pawl cun India ih beh luh cu an rak remti ih saklam Chin pawl khalin Burma ram ih telve cu an rak hril ve. India le Burma in zalennak an rak hmuh veve tikah ziangruangah Chinram khalin zalennak (Independence) a dang ten hmuh a rak tum ve lo? timi hi Chin thuanthu ah thusuhnak nasa bik pakhat a si ringring ding bangin Chinram cu kum ziangmawzat tiang thendarhternak le sâl ih tanternak  “bulhrampi” a si ringring fawn ding.

 

Saklam Chinpawl lakah KAWLpawl thawi kan kawpawk asile zalennak cu zamrang deuhin kan hmuh phah ding tlunah Kawlpawl kawp cu hlawknak a si tiih ruattu an um ih cuipawl cun PINLUNG khua ah Kawl hotu Aung San thawn  lungrualnak thukam cu February 12, 1947 ah an nemhnget. Hi pinlung thukamnak ih hmin ngantu Chin hotu le lalpawl lakih mi pathum te cun saklam – Chin in hmailam pan ih a fehnak ding lamzin cu an rak hril in an rak sial. An sial mi lamzin zawh in saklam- Chinram cu kum 50 lenglo a feh hnelhno rero ih mitthli tlaknak le hathialnak khur thimpi cu nitin in a pan sinsin.