Chinland Quo Vadis; MAHTE RORELTHEINAK

Kan dunglam kum 100 lai ihsin kan tul mamawh bik mi cu kan ram le miphun tlunih thuneihnak sangbik (mahte–roreltheinak) neih a si. Hi thu neihnak sangbik, lole, mahte roreltheinak, lole zalennak hi tuini khalah kan tul mamawh bik mi cu a si.

Hi thuneihnak sangbik neiin kan ram tlun ih ro kan rel theilo ahcun ziangvekin lian in dinhmun tha zet khalah um sehla Sahmuan sungih ramsa cawm thau mi vek fang kan si dingih, kan si ding vekin kan si nawn lo, kan diknak le pian san khal kan hloh, tinak a si.

Mihrek in Democracy dan in ukaw in lian zet le nuam zetih kan um thei hnuhnu cun, mahte – roreltheinak neih kherkher khal a tul nawn lo, ti’n an ruat. Asinan, democracy hmu in sumpai le ei in lamah nuam zetin um hman sehla, hnam dang thuneihnak hnuai ih kan um thotho ahcun Sahmuan sungih thuneihnak neilo “ramsa cawmthau” vek fang kan si ding.

Tui Chin pawlih kan dinhmun ciah cu “Sahmuan sungih “ramsa cawm thau” vek hman silo, ei in ding khawp kham hman pe loih an retmi Sahmuan sungih “ramsa t’awl t’ent’en” vek kan si. Ramsa hrangah cun hramlak ah zalen zetin a duhduh in a vakih a um khi, khuihman suak theiloin Sahmuan sungih rawl thaw tinkim a ei rero hnakin a sunglawi in a nuam deuh; ziangahtile Pathian in hramlak ah zalen zetin tlangleng dingin a sersiammi a si. Zalen zetin hramlak ih a vak thei lo tlunah Sahmuan sungah rawl a duhmi khal a ei theilo sinsin ahcun, cui ramsa hrangah nun man a um lo.

Kan ram ah zalennak le thuneihnak sangbik neiin kan um theilo tlunah eiin khawpkham hman hmulo ih kan um ruangah nun man kan neilo tluk a si. Mi zalen si dingin, luahmi ram hrante nei dingin le cui ram tlunah zalennak thawn thuneihnak sangbik nei dingin Pathian in in tuah ih hi kan pian sanpawl kan hloh thluh ahcun leitlun ah nun man nei kan si thei nawn lo.

Kan ram thansohnak ding thupawl (sumpai thu, ei in thu, fimthiamnak lam thu le a dangdang) ziang vek khal vun relin vun tuah tum sehla, a taktak ih tuah dingin “thuneihnak” kan kut sungih a um lo ahcun zianghman a si thei cuang lo ding. Hihi a takih kan hmuh rero mi le kan tawn rero mi a si.