Chinmi kan fimvar a cu tuk thlang, zoin in siatsuah?

Kan ram in lawng rerotu, kan biaknak hmuhsuam ih siatbal rerotu, kan calai hlawnhloh tum rerotu, an cithlah kan Chin lakih umter hnuah hnam khat le hnam khat, peng khat le pengkhat doaw rero dingih in tuah rerotu, hnam rethei le mualpho si ding ih in tuah rerotu hnamdang mi cu zo an si? Annih cu leitlun pumpi hmanah sualral lam ih hminthang an siih kan tawng cun  “Kawl” kan ti mi phunhnam an si.

Mi hrekkhat in ramthu (politics) le sakhuanak (religion) hi lei le van vekih hla-aw le dangaw verver dingah an ruatih ram thu relnakih sakhua thu vun telh asile an theithiam theu lo. Hipawl cun, ram hrangih hnatuantu cu Pathian thu khal a sim ih sim lole a rel ih rel lo dingah an ret. Cun, Pathian hnatuantu khalin ramthu  cu a rel ih rel lo dingah an ret fawn. Taktak ah cun, Pathian ih a sersiam mi RAM le MINUNG hnatuan (politics) cu a sersiamtu Pathian hrangih tuan tluk a si.

Mit ih hmuh theih sersiam mi ram le minung hrang hnatuannak cang thiam lotu cun mit ih hmuh thei lo sersiamtu Pathian hrangah zianghman a tuan thiam taktak lo ding. Hiruangah, Pathian hnakin a sersiammi ram le minung pawl hi an thupi deuh, a duh khal duhdawt deuh ding an si, ti nak a si lo.

Minung kan si sungah umnak ding leiram kan tul ih cui minung le leiram cu a dangdang tei um in thenhranaw thei kan si lo. Kan thih hnu hmanah leivut ih tuah mikan si bang in leilung lala ih kir ding kan si. Minung in Pathian kan mamawh ringring vekin leiram khal kan mamawh ve.

Curuangah, minung, ram le Pathian hi ziangtizawng hman in zawmawknak a neih ih nei lo phun in feh pi ding a si lo. Minung pakhat ka si hnuah, sersiam tu Pathian le ka umnak ram tlunah ziangvek mawhphurhnak ka nei ti hi theih tum ding a si sawn.

Ahmaisain kohhran lole pawlpi pakhat dinhmun in ramthu (politics) ih hnawihnihawk hi Bible ih in zirhdan vek a si lo. Thimnakah, kohhran pakhat in a sungtelpawl cu ramhruaitupawl hrilawknak ah cu mi kha mi nan bawm ding ti’n fawrhnak a neih asile hihi a dik lo mi a si. Kohhran dinhmun pakhat in mawhphurhnak tumbik a neih mi cu rundamnak thuthangtha phuansuah a si.

Ziangtiklai khalah kohhran cu leitlun politics thawn cawhpawlh loin a hranten a um ringring a tul. Asinan, ram le hnam damnak dingah a thatnak ruatin kohhran cun Pathian hnenah thacamnak in a thlen rinring a tul. Ramhruaitupawl hrang khalah thlacamnak a neih ringring a tul.

A pahnihnakah, Pathian zumtu mi pakhat cun Khrifa pakhat a sinak dinhmunin politics ah a hnawihnihaw in a tel thei ih hihi Bible zirhdan thawn kalhaw mi a si lo. Asinan, hi politics ih a telnak, lole ramhna a tuannak cu a umnak kohhran aiawhin a si lo a tul. A umnak ram ih ram ninung pakhat a sinak le zumnak ruangih Khrifa a sinak dinhmun in politics ah a tel a thiangih a umnak kohhran hmin in politics ah a tel a thiang lo.

Cun, Krifa pakhat cu Pathian rawngbawl dingin kohhran ih hriakthih le nemhngeh (ordained) zo mi asiahcun politics ih a tel le cangvaihnak a neih a thiang nawn lo, ziangahtile anih cu kohhran sungtelpawl, lole, zumtu berampawl cawm dingih Pathian hminih nemhngeh mi a si. Hipawl cu Pastor le Reverend etc. kan ti mi an si ih annih cu rinum zetin Kohhran (zumtupawl) cawmtu ding le zohtu ding an si.