Chinram Khui Na Feh Ding? NEHNAK DING SAN

Kan nih hnakin in dotu le in uk tumtupawl cu minung ah siseh, ralkap le hriamhrei ah siseh an tam sawn, an nei tha sawn. Hihi thudik a si. Asinan, hi ruangah ralpawl cu an cak sawn ding, nehtu khal an si sawn ding kan ti thei lo.

Ziangahtile, NEHNAK timi cu mi va thahtheinak thazang ah siloin, thudik tan ruangih thihnak khal hmaitawn ngamnak parah a um sawn. Thazang cahnak lawnglawng zohin thu kan relcat asile, “A cak lo pawl cu a cak pawlih ukbeh dingah piang an si ih mi rethei pawl cu milianpawl hnuaiih um ding ah piang an si” tinak tluk a si ding. Tawng dang cun, “Hi leitlun cu ramsa hrangpawl umnak ding lawngah a si ih milai umnak ding ah a si lo” ti tluk a si ding.

Ruahnak fim a neitupawl cun ziang khal a dik maw dik lo ti zoh in thu an relcat. Asinan, micakpawl cun ziang khal a dik maw dik lo ti siloin an thazang cahnak hmangin thu an relcat sawn theu. Annih cun a cak lo pawl cu vawi tam an siatsuah theu. Doawknak khalah a cak sawn an si theu. Asinan, NEHNAK ngaingai cotu cu diknak lamah tangin tairialnak le tuarfainak thawn beidawng loih raldotupawl an si. Thimnakah, America le Vietnam pawl an doawk laiah, ralkap le ralkap an doawknakah  Americanpawl cu an hriamhrei a that sawn ruangah a cak sawn an si ringring ti theih a si. Asinan, a netnak ih nehnak cotu cu Vietnam an si.

Curuangah, thazang cahnak lawnglawng zohin nehnak thu kan rel thei lo. Kawlpawl ih ralkap tam sawn le minung tamsawnnak lawnglawng zohin annih cu nehtu (a netnak tiang) an si ding kan ti thei lo. A dik lomi raldotu an si ruangah nehlotu an si leh tengteng ding. A dikmi raldotu kannih pawl cu tuini ah a cak lo sawn kan si hmanah a netnak ih nehnak lallukhum khumtu kan si tengteng ding. Hihi ralpawl kan nehnak ding san le zalennak kan hmuh theinak ding san a si.

Kan hnakih tam le cak sawn kan do ruangah kan doawknak cu “Can rei doawknak” a si ding. Kan ralkap le an ralkap an doawk khalah ralpawl cu a cak sawn an si can a tam ding. An hriamhrei le ralkap hmangin kan beidawng dingin a phunphun in kut in thlak ding. Kan thinnau dingin kan karlakah remawklonak le hmuhsualawknak phunphun an tuah ding.

An lamih tang dingin mi tampi thlemthluk an tum ding, mi hrekkhat cu an hruai peng thei fawn ding. Cule kanmah lala hmangin  kanmah le kanmah in doawter ding. Kan inn le kan lo in nawk kang sak ding, an siatsuah dingih mipi cu a phunphun in retheihnak le harsatnak an pe ding.

Asinan, hipawl hmuahhmuah tuartlangin hnget zetih kan feh vivo ah cun kan thinlung an neh thei lozia an thei ding. Hi can ciah hi kan nehnak ding hramthawhnak cu a si ding.

Curuangah, thazangcahnak cu a mah le tawkten thiltithei le tihnung zet a sinan a netnak ih nehnak petu cu a si lo. A tawpnak ih nehtu cu lungthin taktak ih tairialnak, tuarfainak, tumruhnak le a dikmi parih ding ngam ringring hi a si.