Daw Suu-i Sorkar leh Economic

Myanmar ram hi sumdawnna leh investment titute tan an zinkawng tha ber tur a nih thu State Counselor Aung San Suu Kyi chuan tun hnai an ram khawpui Naypyidaw-a ni hnih chhung zet awh Investment conference an neihnaah a sawi.

Chutia ramdang mite tana sumdawnna leh investment siam nana a beiseiawm thu a sawi rualin, hnam tih chimih tumna ang hiala ramdang miten an ngaih Rohingya Muslim chung chang engmah a sawiloh avangin investor tam tak chuan an ring ngam chiah lo.

Ram dang atanga sumdawng milianho fuankhawm hmaah Suu Kyi chuan Myanmar ram chu Asia khawmualah economic lama thang duang chho mêk ram duhawm tak a nihna a sawi uar hle a. Foreign investment siam duhte tan an lo lawm reng tih a sawi bakah tun hma anga a awpa in awpbeh lam chi kha sorkar thar policy a nih tawh loh thu pawh a sawi a ni.

Tin, Asia ramah ram rethei ber dinhmun atangin insiam that ngai apiang insiam thain kum 30 lo kal leh turah sumdawnna lama ram thangduang tak leh hmasawn ve hle tawh ram a nih a beisei thu te, chumi atan ramdang atanga investment tiduhte an sawm reng thu te pawh a sawi a ni.

“Sowth East Asia ah open market system kalpuiin ram hnufual berte zinga hmasawn chak ber leh tha ber a nih theih nana investment lama boruak tha tak a lo thlen theih nan tute pawh kan sawm a ni”

Investor lam atang chuan a sawi ang diak diaka pawm mai erawh a la harsat hmel a. Sumdawnna lam awlsam tak leh zangkhai taka kalpui a nih theih nana dan felfai tak siam a la nih hrih loh a vangte, hnam in chimral tumna policy an kalpui nia ngaih theih khawpa Rakhine lama buaina a thleng mek chung pawha human right lamah dan leh dun a kenkawh that hleih theih loh a vangtein sumdawnna puitham siam nan a la rintlak loh thu an sawi a ni.

Suu Kyi thusawiiah pawh heng thu pawimawh tak tak – investment lama thil a fel theih nana dan felfai tak neih chung chang leh human right lam te hi a sawi tel ta miah lo chu pawi a tih thu Myanmar tana inhmang nasa tak Burma Campaign UK a thawk mek Mark Farmaner chuan a sawi a ni.

“Hnam tih chimih tum ram leh human right palzut tak ram angin miin min hmu a. Hei hi investor-te lo luhna daltu lian tak a ni. Daw Suu-i thusawi pawh hi investor- tam zawk chuan an lawm viau lo. Myanmar ramah hian an tan invest tur tam tak a awm tih chu an hai hlei nem. An mamawh chu him taka awm theih hi a ni bawk a ni.”

Mark Farmaner chuan investor-te mamawh chu human right lamah an tha tih finfiahna a nih thu a sawi bawk.

He ni hnih awh conference-ah hian ram 17 atangin palai mi 400 chuang an kal a ni. Chûng zingah chuan a ram thenawm – China, Japan, Singapore leh Thailand atanga kal an thahnem ber. Rakhine buaina avangin European Union-in a lo siam sak Tax Free Zone hi hlihsak leh a tul mai theih thu Europe lam hian an lo sawi ve mek bawk a ni.

Hetia khawthlang lam an inhnuh dawh avang hian khawchak lam, Asia ramte an rawn lut ngei ang a. Mahse, sumdawnna lama intlansiakna a nasat tur anga a nasat theih dawn loh avangin Myanmar tan chuan a la pawi hle thei a ni tih U Kan Htun, tuna US a awm econimist chuan a sawi a . A bikin, Chinaa a innghah lutukna hi a tlansan theih a duhawm hle thu a sawi bawk.

Myanmar-ah hian Foreign investment hi Daw Aungsan Suu Kyi kaihhruai sorkar a lo din tan, 2015 – 16 khan US $ 9.5 billion a tling chho va. Nikum 2017-18 ah erawh chuan 5.7 billion ah a tla a ni.