ENERGY DRINKS (THAHRAM ZUKDIR MITHATTU) – 2

Hnaṭuannak le cangvainak pakhatkhat ruangah kan bang, kan cau ih kan tha a mal tuk ruangah thangzang umsal dingin Energy Drinks kan in ih kan bang a reh ih thazang umsal in kan thei aw. A ngaingai ahcun Energy Drinks (Red Bull, Monstar, Shark tivek) pakhatkhat kan in tikah thazang a umsal kan timi khi thazang umsal si lo in netabik ih kan hman dingmi thazang kha kan rak hmang a si sawn. Phundang in kan sim asile Energy Drinks in a ṭul tuk caan ih kan hman dingmi thazang in hmangter tinak a si. Kum reipi kan hman dingmi kha caan rei lo te sungah cem ko in in hmangter khi a si.

Himi thu thawn pehpar aw in kan fiang deuh theinak dingah Saya Stanley Hlawn Hmung ih nganmi “THAZANG TAKSA SUNG A KHAWLAWKDAN” (How energy stored in our body) kan vun zoh tlang hnik pei.

Thailand ram ah kumtin ten Germany mi nu le pa nuamnak (sex) hmang duh ruangah cahnak sii a hlei ih hmang in a thimi hi mi 10-20 luan an um ringring. Tulai san ah cahnak sii a phunphun hi dawr tinkim ah ol ten a ngah thei. Hnaṭuan tam tuk le damlo le mithi zanmeng, zanvar bawlung zoh pawl le nu le pa nuam aw duh pawl hrangah cahnak sii a phunphun lipovitan asilole energy drink a phunphun kan hmang tikah ralrin ṭul zetmi thil tampi a um.

Kan taksa hrangih cahnak taktak cu protein (sa) le thisen sungih glucose (cini) hi a si ih a dang cahnak sii pawl cu bumawknak men a si. Taksa sungah cahnak(energy) hi phunhnih in a khawl aw. (1) Nitin kan hman dingmi cahnak le (2) ATP an timi ṭul ngaingai (emergency) tikih hman dingmi thazang ti in phunhnih in a khawl aw. ATP hi thazang cem thluh hnu cangvaih ṭul ngaingai um tikih hman ding ih tuahmi a si. Damlo ruangih tho thei nawn lomi kiangah rul, meikang ṭihnungmi pakhatkhat um tikih tlannak dingah netabik hman dingmi thazang retmi (reserve) cu a si.

Asinan cumi ATP thazang kan hmang cem thluh hnuah hmaisabik rulhsal a ṭul. Curuangah ti le rawl ei lo ih reipi a naatu (dam lo ih umtu) pawl rawl ṭhaṭha ei khalle thazang an nei thei lo kan timi hi ATP thazang khawlnak ah a rulhsal rero lai ruangah a si. ATP thazang a khat hnu lawngah nitin hman dingmi ah a kuat thei lai.

Curuangah caknak sii kan ti `heumi pawl hi protein le glucose si sawn lo in punghman hman ding a cem hnuah ATP ta cawisung theinak ding taksa system bumnak a si. ATP thazang hi tu le tu na hmang a si ahcun san a tawi thei hlei ah nunnak khal a cem ol te a si. Thil hi a tawkfang timi hi a ṭha nan a hleifuan a si tikah a sia thluh ringring. Lairawn Meifar