Facebook Hack a tong; minung 50 million pawlih account on sak

Tlawngkai n inga sun ah khan leitlun mipi vangtlang ih hman tam bikmi Facebook cu hackers pawlih hack a tongih minung million 50 lenglo ih account an on sak. Tuiṭum ih hackers pawlin Facebook an hack vek hi cu tuihlan khalih a rak umdah kellomi a roh bikmi a si, tiah Business Insider cun an tarlang.

 

Tuiṭum ih Facebook in hack an tonmi hi a rak dintir ihsin tuisun ni tiang an rak ton dah kellomi a si. “Hack sakmi account pawl hi ṭhatlonak lam in an hman sak pang maw ti cu theihfel a si hrih lo, asinan tuah thei tawk suah in kan hnaṭuan kan pehsunzawm rero a si ruangah a tharten kan update sal ding a si” tiah Facebook CEO Mark Zuckerberg cun media conference nak ah a sim.

 

Silicon Valley ih Tech cun Facebook cu hacker pakhat khat asilole miburpi ih hack a tong ti an hmusuak ih, hackers pawlih cangvaih dan cu Facebook Profile ih ummi “View As” timi feature te kha an rak lakngahmi a si ih, cumi ihsin mi tampi Facebook account an lut theinak a si, tiah an sim.

 

Facebook’s VP of Product Management Guy Rosen cun “Himi hackers pawlin an hack ngahmi tokens hi Facebook lut tikih log in nak password thawn a bangawmi an si, himi an ngah hnuhnu cun App thawn an hmanmi an Facebook cu Sign in hnuaihni ṭul loin Facebook icon hmet veten a Logged in cih mei a si”. Tiah a ngan.

 

Tuiṭum Facebook in Hack a tonmi ah minung million 50 zikte account an access mi lakah Facebook CEO Mark Zuckerberg rori le COO Sheryl Sandberg tei’ pahnih account khal hack tel a si, tiah Facebook ṭuanvoneitu cun a sim a si.