HUMHIMAWK HI THILSUAL A SI MAW? (Chinland Quo Vadis)

One soldier with his tow enemies that he're trying to protect country for all people in his country living with well. this is toy figures of soldier set on the green fiber cloth for make forest scene.

Leitlun ram pawl thuanthu kan zoh tikah, ziang maw can talah an ram ih thu ra neitu le ra nei tumtu umlonak ram a um lo. Cun, hivekin ra uk tumtupawl rak do let lo ram an um fawn lo. Anmah le an ram, an diknak le thuneihnak, an hnam dan le zalennak pawl humhim tumih ral do lo ram pakhat hman a um lo.

 

Israelpawl tla cun an ram in zalennak tluansuak hmu dingin kum thawng thum lenglo ral an do. Asile, zalennak hmu thei dingin le an ram humhim dingin hitivekih hriamhrei phunphun thawi ral an do cu a sual kan ti thei pei maw? A sual a si ahcun Pathian rori in an ral donak phunphun cu a bawm lo ding. A suallo ruangah Pathian cun a bawm a si sawn.

 

Cun, tui America ram khi Washington ho in nunnak tampi pe in Mirang (British) pawl an rak do rero hnuih an din suakmi a si; a nemzawng (non violence) le Biakinn ih thlacamnak men ihsin an rampi khi an dinsuahmi a silo. Asile, khativek in Washington ho in Mirang cozah an rak do kha a  SUAL kan ti thei pei maw? Ti thei lamlam hlah. Tuiniah kan Chinram tiangin Pathian thunung thei dingih kan mit in ti vang tertu le leitlun ram harsa le rethei pawl hmuahhmuah bawmtu cu America a si.

 

Ram dangdang cu vun simlo tui KAWL RAM lala khal kum 122 sung Mirang uknak cu a phunphun in do lettu an si. Asile, khativek in Aung San ho in Mirang cozah an rak do kha a sual kan ti thei pei maw? “Uktu Mirang cozah an do ruangah Pathian thu kalh an si” kan ti thei pei maw? A ti kan um lo ding. Kan tilo ruangah Burma independent day (luatlatzi nih an ti mi) cu kannih Chin pawl khalin kum tin kan rak lawm ve a si hi.

 

Asile, ziangruangah… ziangruang bikah… tuini ah kan ram in zalennak a hmuh theinak dingah tin, kan miphun humhim tumin kan thahrum neihsun suahin thlan, thisen le mithli luang rero in sâl ih in tuah kumkhua tumtu KAWL COZAH kan do cu “Uktu cozah an do ruangah an sual” na ti ka ti thei ding?

 

Kannih Chinpawl ruangah hnamdang kuthnuaiah um kumkhua dingin Pathian in in tuah maw si? Pathian in zalen dingin a tuahmi milaipawl lakah kan tel ve lo maw? Kan lennak le umnak dingah Pathian in ram in pe ve lo maw?

 

Pathian in hnam pakhat ah in sersiam zo. Mi zalen si dingah in tuah zo. Kan luah kumkhua ding le a tlunih ro kan rel dingah “Chinram” in pe zo fawn. Curuangah, hnam pakhat dinhmun in zalen zetih kan um ih kan mai ram liolio tlunih kan thuneihnak pawl in ra hnaihnawktu cu zovek an si khalle kan do let tengteng a tul. Hihi humhimawknak a siih Pathian thu vek a si.

 

Hihi kan tuah ding hrimhrim, kan liang parih a thumawmi phur a si. Hihi a thiang mi a siih a sunglawi ngaingai mi a si fawn.