India miphun pawlih an thahmi American Missionary John Allen Chau ih ruak la suak thei hrih lo

Jesuh Khrih ih rundamnak thuthangṭha cu mikip hnen ah phuangdarh ih karhzaiter dingin, mi hmuahhmuah rundam an si theinak dingih, nunnak tiang liam ih a tikcu can hmangtu American missionary John Allen Chau ih ruak cu India cozah thuneitupawl in lasuak thei dingin nasa ten an zuam rero.

Hi Thuthang maksak tak hi tufang leitlun mipi ih ngaihven hlawh zet a si. American missionary John Allen Chau, kum 27, cu India cozah thununnak hnuai ih um (India ram sung) Adaman Islands ih hramlak minung pawl hnen ah Jesuh Khrih rundamnak thuṭhang phuang dingin a feh ih cui’ hmun ih a khawsatu hramlak minung (လူရိုင္း) pawlin an rak that.

Lawng ihsin an zuk ngahmi Hramlak minungpawl

November 17 ah khan Ngakaitupawl cun Missionary John Allen Chau ih ruak cu hramlak minungpawl in tipithuanthum kap ah an phum lai an hmuh thu an sim. Asinan hi hramlak minungpawl umnak hmun hi anmah miphun a si lomi, mi dang hrimhrim zohman lut ngah lo a si ih, a luttu cu zo ti umloin an that theimi cu an rak that ṭheh.

John Allen Chau khal hi an thah hlan ah, Thal (arrow) thawn an rak sai ciamco ih hliamtuar in ṭum hnih lai vokkuang lawng thawn a kir. Asinan hi miphun pawl thlarau seherh tuknak ruangah thal ih an sainak hliamtuar cingte thawn a fehsal thotho ih, a netnak ahcun ra kirsal nawn loin hramlak minungpawl ih kut in a nunnak a liam.

India ram Islands ih um Hramlak minung

John Allen Chau ih thih thu thawn pehpar in India cozah thuneitupawl cun Chau hruaitu tualsung minung 7 pawl an kai. Hi Islands (Tipithuanthum laifang ih a ummi tipho) ih a ummi hramlak minungpawl umnak hi zohman lut/feh an sianlonak hmun a si. Cumi thei cingin Chau an hruai/fehter thotho ruangah an kaihnak san a si.

Tu-ah John Allen Chau ih ruak hi India cozah thuneitupawl cun lasuak thei dingin an zuam rero laifang a si. Zarhte sun ah khan hi hramlak minungpawl umnak ihsi kaih 430 hrawng hlatnak ah Lawng thawn an cawl ih, hramlak minung pawl hin do dingin ready cia ṭhepṭhep in an rak zoh ve, curuangah India police pawl cu an Lawng thawn dungsip in an kirsal thu, Police hotu Dependra Pathak cun AFP hnen ah a sim.

hramlak minungpawl

“Ngakaitupawl ih bawmnak thawn Missionary John Allen Chau ih ruak an phumnak cu an thei ngah zo. Asinan hramlak minungpawl in an kil ṭhepṭhep ruangah awlsamte ih laksuak theih cu a si hrih lo, thei tawk kan zuam rero lai a si” tiah palik bawi cun a sim bet.