Kalaymyo Ah Zaan Suimilam 10 Hnu Dawr On An Kham

Kalaymyo khawpi ih vengtin le khawte ih awn-au thawmvang umnak zaten phunhra camibuai tuah sung zaan suimilam 10:00 hnu zohman dawr ong lo dingin March 5 ah Kalaymyo peng khawkhang committee in ca a suah thu theih a si.

“Nauhak pawl cazoh caan ah awn-aunak um lo dingin le kiangkap hnaihnok in awn-au um lo dingin atu bangtukih ca kan suahnak a si” tiah Kalaymyo peng khawkhang committee chairman U Ngi Ngi in simnak a nei.

Kalaymyo ih veng le khua pawl zaan ih dawr on lo ding hleiah awn ring soundbox tivek thawn mi hnaihnok ih thiltuah lo ding khalin zangfah dil phah in kham a si.

“Kham hleicemi hi veng le khua ih thawmvang tamnak zu dawr ihsin thokin awn-au ih kiangkap hnaihnok tivek tuah lo dingin kan kham” tiah U Ngi Ngi in a sim.

Phunhra camibuai tuah sung March 5 – 15 tiang Kalaymyo khawsung ih Karaok dawr pawl kha zaan suimilam 10:00 tiang ong dingah caan khiahsak an si. Daan thlunlotu dawr pawl cu an thu relsak an si ding tiah theih a si. Ref : PNJ