Kum 17 Tleirawl Fala in ek-inn sungah fa hring

Tulai kan san tak hi cu aw, ṭhangthar nonawn pawl kum kimlo teten falat/tlangval an thiam, sualralnak an tuah, nupa sinak an hmang tiih riahsiat rero lai ah, mi ṭhen cu anmah an unau suahpi rori thawn nupa sinak an hmang tlang, an Tuu le Fa thaw rorin nupa sinak an hmang tlang. Hipawl hmuh le theih tikah Nulepa hin kan fale kilkhawi dan hi kan thiam ih kan ralrin a thupit zia in theihter.

IPOH: December 15 ah, Malaysia ram Ipoh ramṭhen Kampar ih ummi, tlawngkai lai tleirawl fala kum 17 mi cu ruah banlopin ek-inn sungah fa a hring ta riai. Hi tlawngta tleirawl fala ih naute a hrin thu thawn pehpar in amah ih suahpi unau rori a simi a Nau, kum 13 ih upa, cu tuini December 16 sun ah kaih a si ih palik ih kilkhawinak hnuai ah a um.

Thu umdan cu; tleirawl fala hi a pang/pum na in ek thawh dingin dailen inn lam a pan ih dailen inn sung ahcun a pang/pum na hrumhrak in a au ciamco. A Nu cu lungphang zetin dailen inn ahcun a fanu ih au raak a theih veten a lut cih, a fanu cu thisen tampi thawn a hmu ih naute ek-inn sungih um cu a hmu tariai. An pahnih in zamrangten sizung ah a Nu in a fehpi cih.

Tleirawl fala nute hi kum 14 a ti ihsin tlawngkai a cawl. Naute a neihdan thuhla an sut tikah, tlawng kai nawnloih a cawlh hnu ah, a ṭapa (amai naupa) thawn, May thla ihsi khan an inn dunglam ah nupasinak an rak hmanthup ringring thu a relsuak. Asinan naupai pianhmang ih ziangti hman a umlo ruangah nau a pai le pailo a rak thei awlo.

Tuah naute cu ek-inn kaw sungih a tlaknak ruangih a khawnawknak pawl tuamhlawm rero lai a si ih, naute nu khal a thisen a dok/suak tamtuk ruangah, an Nufa in Raja Permaisuri Bainun Hospital (HRPB) ah tuamhlawm rero lai an si. Fa a raihtu, a naupa, cu tuah palik kutsung ah a um ih Malaysia ram dan Section 376B Penal Code thawn a thuhla zohhliah rero lai a si.