Kum Kim Lo Ram Dang Kuattu Lakah Chin Hluttaw Palai A Rak Tel Ve Zo

Tu nai te ah Aljareeza news in Myanmar ihsi Singapore feh, kum kim lo pawl ih thil tawn cu vedio in an hun tuah ih, cu cu Aung Min ti mi kawlpain a rak let sal. Cui vedio cu ziang tin tin simaw ka rak zoh ngah. Ka lung i kuai tuktu thil pakhat a um – human trafficking kan ti, cozah le biaknak lamin kan do tlan rero lai ah, a dotu dingih tel ve, ram le miphun in hruaitu, kan mi rinsan tak, Chin ramkulh ai awh ih Pyithu Hluttaw palai ih hril tlin mi hmin an sal tel hi pawi ka ti zet.

A vedio hi, kan Chin palai ti hminsiat an tum hrim hrim ih tuah cu an si lo ti a rel theih. Kei kha hi thu ka hun ngan hin kan palai ti hminsiat tum hrim hrim cu ka si cuang lo. News la khawmtu pakhat ka si vekin, thil dik tak rel hi ka ti ding a si. Thu dik cu a lang sal tho tho, an rak tivek kha a si.

A vedio ah hin Cho Cho ti mi kawl nu ih tuarnak thuhla an lang ter. Cho Cho cu kum kim lo in a unau nu thawn Singapore an feh. A unau cu thinpit vansang ih a um ruangah in sang tuk ihsin a zuang thla ih a thi (kan thei cio men thei). A kuattu company hi Global Manpower Agency si awm tak a si. 2015 hlan sung hmuah hmuah ah khan hi company ih an hotu, Managing Director cu Chin State ihsi Pyithu Hluttaw palai rak ṭuan ṭheu U Zung Hlei Thang a si ih, 2015 kum khan midang hnenah a hlan sawng zo. Vedio tuahtu Aljareeza cun, hi mi Louis Zung Hlei Thang hi kum 2014 ih cozahpi in phunglam a rak tuahmi a rak buar ve a si, ti a rel kher kher.

Amah lo midang an tam tuk ding. An zingzoinakah cun kum kim lo te te khal, ram harsat ruang ih sumpai va hawl duh kan si cio ruangah, kum kim ih pawm dingin company pawlin an tuah thu le, cozah lamin cu tlukin an theihpi lo thu an rel. Singapore hi official ih va feh theinak a si rual rualin cozah si loin a va kuattu company pawlin ṭuanvo tumpi an neih thu, hi vek lam zingzoi ih buaipi tu Daw Mar Mar Oo cun a rel.

Kan rel duhmi cu kan ram hi a har, ram sungih sumpai mal tuk hlawh kha, ram dangah cun zia um deuhin kan va hlawh thei. Curuangah, a zo zoin ram leng ih va hlawh-awk cu kan duh thluh. Cui dinhmun cu remcang ih lain kan rin tuk mi khalin, kan ruah dan si lo tukin, an mai hlawknak ding lawng ruatin thil an rak ti thei. Kum kim lo ih feh cu, Singapore a va si hmanah, feh lo hrih mai sehla ti cu a tuartu Ma Cho Cho in mi a cah duh bik a si.

Aw, ka let duh zik lo. A vedio hi rak zoh uh la, Chin mi kan mualphonak, in hruaitu pawl hminsiatnak a um rual rualin Singapore le ram dang dang feh ding pawl hrang ralrinnak ah ka hun share.

https://m.facebook.com/story.php?story_fbid=348102782457161&id=114993045768137

Salai Pa Hram

Be the first to comment

Leave a Reply

Your email address will not be published.


*