Lailun kiang hramlak Lo sungih an cinmi celreng cu rukru pawlin an ruk sak

Falam peng Sunthla ram Lailun kiangte ih Rev. Lon Thang in an Loram sungih a cinmi celreng pawl cu September 21 sun ah an firsak tiah theih a si. Rev. Lon Thang hi Chin Christian Institute of Theology (CCIT) (Ahlan ih ZTC) Bible tlawngih zirhtu pakhat a si. An Lo ih an cinmi celreng firtupawl hi zo an si timi fiangten theih a si hrih lo.

 

Rev. Lon Thang ih Loram hi acres 2 tluk lai khat in celreng a rak cingih, celreng a tum deuh deuh pawl hril tahrat in rukru pawlin an rak ruksakmi a si ih, cuai 600 ihsin 800 karlak hrawng an ruksak tiah theih a si.

 

“Celreng hi thlanglam Laitlang ah tla cun nasa ten an cing ciamco ih hlawknak tampi an ngahmi tla mithmuh theih rori a si zo. Falam khalah cing in nei cio sehla sumlut tampi ngah a theih a si timi langternak hrangah tiin 2010 lai ihsin Lo ka rak tuah thok ih 2013 ihsin celreng pawl ka rak cing thokmi a si” tiah Rev. Lonn Thang cun Chinland Herald hnen ah a sim.

 

Tufangte hi celreng man a ṭhat laifang a si ih cuai khat ah Ks. 6000 hrawng a si ih, cuai 800 ahcun Ks.6000 zin ih ṭuat cun ting 48 rori a si. Rev. Lon Thang ih Loram sungta celreng an ruksakmi hi ting 48 man zat lai a si. Celreng a ṭhatnak le a tum deuhdeuh pawl an hril ih an firmi a si.

 

Falam peng le ramsung ah ramsa ih siatsuahmi si fawn lo, meisa ih kangmi si fawn lo, minung rori ih siatsuah le firsak ruangih hivek sunralnak thlengmi a si ruangah zozo khal ralring cio dingin le a firtupawl hi khaw senpi in hawl cio tlak a si. Chinland Herald