LEITLUN IH UNIVERSITIY HMAISABIK PAHRA

Kan umnak leilung tlun pumpuluk ih Phunsang tlawng (University) hmaisabik rak dingmipawl cu a hnuailam vekin an si. B.C san laipawlih rak dinmi cu tui’ sanah an um nawn lo. Himi cabu ih tarlangmipawl cu an din kum ihsin tui’sun ni tiang a ding laimi, a reipi/hlunbik pawl an si. Leitlun ih tlawng hmaisabik dinmi tampi lakah pahra (10) tiang lawng tarlang a si ih, apahratnak ihsin thawk a si.

The University of Valladolid cu mikip hrang Phunsang Tlawng a si ih Spain ram Valladolid ram`hen Valladolid khawpi ih um a si. Himi Phunsang Tlawngah hin degree pek hrih lomi (undergraduate) zirlaipawl 31,780 an um ih Tlawng cazirhtu 2,000 lenglo an um.  Himi University of Valladolid Phunsang Tlawng hi University of Palencia ihsin cazir nak an `hawnaw ih cutiin Alfonso VIII of Castile in 1241 kum ah a rak dinmi phunsang tlawng a si. Leitlun ih University (Phunsang Tlawng) hmaisabik apahranak a tling a si.

The University of Siena cu Italy ram Siena ih um a si. Hi Phunsang Tlawng cu Siena khua ih Commune in 1240 ah a rak dinmi a si. The University of Siena cun 2006 ah khan tlawngta 20,000 hrawng a nei. Tuisan ah cun The University of Siena hi Law le Medicine zirnak tlawng hminthang zet a si. A hmin diktak cu Studium Senese tiah an ko. Kum 1808 – 1815 karlak ah a langte sung Napoleonic ih hna`uan fial ruangah an rak cawl. November 7, 1990 ah 750th Anniversary an tuah. Leitlun ih University (Phunsang Tlawng) hmaisabik apakuanak a tling a si.

The Universite’ de Toulouse cu 1229 kum ih rak dinmi a si ih a dintu hi mi pathum-li lai an si ih cumi lakah Bishop Foulques de Toulouse hi a telve. Leitlun ih Phunsang Tlawng hmaisabik apariatnak a tling ban a si.

University of Naples Federico II cu emperor of the Holy Roman Empire san lai June 05, 1224 kum ah Frederick II ih rak dinmi a si. A hmin cu a dintu Frederick II ih phuahmi a si.Himi tlawng ihsi tlawng `heh hminthangzet pakhat cu Roman Catholic theologian le philosopher asimi

Thomas Aquinas a si. University of Naples Federico II cu leitlun ih     University  (Phunsang Tlawng) um hmaisabik apasarihnak a tling ban a si.

University of Padua Phunsang Tlawng hi Bologna Phunsang Tlawng cu cathiam sangpawl le professors pawlin an suahsan hnu kum 1222 ih dinmi a si. Italy ram Padua khawpi ih um Phunsang Tlawng a si ih Italy ram ih Phunsang Tlawng hmaisabik a pahnihnak a si. Kum 2010 laiih an hisap danah tlawngta 65,000 hrawng an um. Hi tlawngah hin ahmaisabik zirmi subjects pawl tla cu Law le Pathian thu (theology) tla an si. Leitlun ih     University (Phunsang Tlawng) hmaisabik aparuknak a tling a si.

The University of Salamanca Phunsang Tlawng cu Madrid nitlaknaklam Salamanca khawpi sungih um, Spanish ram ih, fimthiam zirnak tlawng sangzet pakhat a si. Hi Phunsang Tlawng hi King Alfonso IX in kum 1218 ih a rak sakmi a si ih, Spain ram ih phunsang tlawng hmaisabik/hlunbik asiih European ram University ah cun apathumnak a si. University of     Salamanca hi European ram phunsang tlawng dingmi pawl lakah dikzet le daan vekin acozah theihpimi hmaisabik a si ih “University” asinak cu King Alfonso X in kum 1254 ah a rek pe ih Pope Alexander IV in kum 1255 ah a theihpimi a si. Leitlun ih University (Phunsang Tlawng) hmaisabik   apanganak a tling a si.

University of Cambridge cu Oxford University tlawngah khawsungmi pawl thawn thukam elawknak a rak um ruangah cathiam sangpawl in Oxford an rak suahsan hnu kum 1209 ah an rak din ih kum 1231 ah Siangpahrang theihpinak a rak ngah.

The University of Cambridge cu United Kingdom ram ih Cambridge khawpi sungih ummi Phunsang Tlawng a si. Hi University hi mirang `awng ih Phunsang Tlawng ummi hmaisabik apahnihnak a si ih, leitlun ih University (Phunsang Tlawng) hmaisabik apalinak a tling a si.

Leitlun ih rinsan bikmi le a hngetkhoh bik le hlunbik Phunsang Tlawng tiih theihlarzetmi University of Oxford  tlawng a si. Hi Phunsang Tlawng hi ziangtik kum ni le thla ah an rak sak thawk ti cu theihfiang a si lo. Asinan Oxford tlawng sungih zirhawknak form sungih a umdan ah cun 1096 asiih kum 1167 ah hmakhatte ah a`hangso ti a si. Ziangtin tile Henry II in Mirang tlawngtapawl cu University of Paris ih tlawngkai nawn lo dingih a rak kham laiah khan a si. University of Oxford cu leitlun ih University (Phunsang Tlawng) hmaisabik apathumnak a tlingban a si.

University of Paris cu 12th century (Kumzabi 12th) ih rak dinmi asiih kum 1160 le 1170 asilole kum 1150 hnakih tuan, hrawngah officially ih recognized mi a si. Leitlun ih University (Phunsang Tlawng) hmaisabik apahnihnak a tling a si.

University of Bologna hi leitlun Phunsang Tlawng, tui’sun ni tiang a ding laimi pahra lakih a hlunbik/hmaisabik Phunsang Tlawng a si. Hi Phunsang Tlawng hi kum 1088 ih rak dinmi a si ih tlawng hnge`ek tamzet nei asiih kum 2000 ah khan University of Bologna ih tlawngkai, tlawngta minung 100,000 hrawng an um. A hnge`ek tlawngpawl cu Imola, Ravenna, Forli, Cesena le Rimini an si ih an hmunpibik cu Buenos Aires a si. University of Bologna cu leitlun ih University (Phunsang Tlawng) hmaisabik a tling a si.