MAH LE MAH RINSAN AW IN: Chinram Khui Na Feh Ding?

Mah le mah rinsan ih todelhawknak a tum lo mi ram cu a ding suak taktak dah lo ding. A se bik dinhmun khal a tawn tlang thei lo dingih dung ah a tawlh sinsin ding. Mah le ke ih din tum lo le ding ngam lo minung pawl cun, an duhmi le tumtahmi thleng thei dingih an tul mi cahnak an nei lo, theih le hmuh hrih lo mi bawmtu le thil thleng ding hngakin an um ve menmen.

Kan Chinram thansohnak dingah, “ramdang bawmtu” an um lawnglawng ah a cang thei ding ti’n kan ruatih  hi kan ruahnak parah kan thumaw tuk asile thil tihnung zet a si. Midang le ramdang hnen ihsin bawmnak lawnglawng rinsannak cun mai ke ih din tum lonak le din paih lonak mi a thlen. Culawng a silo, hi vek ruahnak kan nei asile, zum le ruah vekin bawmnak a um lo tikah beidawng mangbang in um phah a theih.

A hleicein zalennak hmu dingih hna kan tuan rero laiah mah le mah rinsanawknak kan nei lo asile umzia a um nawn lo. Curuangah, mipi cu pawnlam bawmnak lawnglawng beisei lo dingin zirh ding a si. Kan hmailam can ih kan dinhmun ding cu pawnlam bawmnak parah hngatawter loin kanmah le kanmah kan rinsanawknak parah hngatawk ter sawn ding a si.

Midang bawmnak lawnglawng rinsan cingin mah le mah hngetkhoh zetin sawh hngetawk a theih lo. Mah le mah rinsanawknak lawngin hnget zetin a tuahawk theih. Hngetkhoh zetih sawh hngetawknak um loin nehnak ngaingai a hmuh theih lo. Curuangah, nehnak ngaingai co theinak cu mah le mah rinsan awknak parah a um.

Kanmah te tan lain kan tuan rero hnu lawngah  nehnak co thei dingih in dipdaltu le khamtupawl cu a tifeldan kan thiam ding. Mai innsang le umnak ramih theihtawk tan lain todelhawk kan tum hnu lawngah pawnlam khalin bawm caknak in nei thei. Curuangah, mah le mah rinsanawk thiam lotu cu ram le hnam duhdawtu ngaingai le hnamdamnak hrangih a netnak tiang hnatuan tlak ngaingai an si thei lo.

“Chinram cu kan ram a si” tiih au rero lawng khal a tawk lo. Tawngkam men le au reronak men in rampi a dingsuak ter thei lo. Theihtawk suahin a takin hna kan tuan a tul. Tawngkam cu tuahnak in a thlun a tul fawn. Asinan, hi tuahnak le tawngkam cu a dikmi lamzin le policy parih a hngatawk lawngah hlawhtlinnak a hmuh theih.

Curuangah, a dikmi lamzin le policy zawhin kan au ih hna kan tuan asile hlawhtlinnak kan ram hrangah kam hmu thei ding. Zalennak hmu dingih kan cangvaih rero lai ah siseh, kanram in zalennak a hmuh hnu khal ah siseh, a dik mi lamzin zawh in mah le mah rinsanawin hna kan tuan vivo ahcun kan Chinram cu kan tungding thei tengteng ding.