Mai’ Tunu rori pawngsualtu Pa Thangthuama cu kum 22 sung thawngtla dingin relcat

Kalaymyo, Indaing Kone vengih um, U Thangṭhuama, kum 45 cun amai tunute kum 11 ih upa cu rapthlak zetih a pawngsual ruangah December 20 ah khan Kalay Thuṭhen zung cun, Pu Thangṭhuama cu kum 22 sung thawngthlak siseh tiah a thuhla an relcatsak, tiah thuthang theih a si.

Hivek thil rapthlak a can dan cu; June 24, 2018 zan ah pawngsual a tuartu, (hmin tarlang lo) kum 11 ih upa le a naunu te cu, an Ni sizung a um ruangah, a Ni te cu an va riahpi. Himi zan ah hin arang (a Ni ih pasal) cu zuripi thawn zan nazi 11 – 12 karlak hrawngah a ra tlungih, kum 11 ih upa a tunute cu a pawngsual rumro mei a si.

Hi thubuai hi a thawk ahcun anmah sungkua le sungkua an si ruangah zianghman buainak le palik hnen lamah thuhla thanih tazacuai awk umlo in an ṭha/rualrem thluh zo. Asinan hivek thuhla a um timi Nunau Canvo lam pawlkom hnaṭuantu pawlin an rak theih veten July 19 sun ah palik zungah an report a si tiah theih a si.

Pawngsualtu cun thuṭhennak ih an thutitluknak parah a lung a kim ih, cawhkuan an pekmi, kum 22 sung thawngtlak dingih cawhkuan khal a lungkim. Pawngsual a tuartu nauhak nute ih harhdamnak khal a ṭha in a felfai ko, tlawng khal ṭhaten a kai peh vivo thei ko, tiah a sim.

Pu Thangṭhuama hi fate pa 4 nei zo a si ih, Tu pathum (3) tiang hmu zo tu a si. Pu Thangṭhuama cu Panel Code section 376 (Pawngsual hremnak Dan) thawn kum 20 sung thawngthlak le Section 354 thawn kum 2 sung thawngthlak, azaten kum 22 sung thawngtla dingin a thuhla retcatsak a si. Zalen