Mike Pence-an Donald Trump Thlavang Hauhin, Barack Obama a Dem Hle

Sept 9, 2018(MSR): Sunday zinga “CBS’s Face the Nation”-ah US Vice President Mike Pence chu kawm niin, tunkar liamtaa President Donald Trump na taka beihna awm chu, na taka chhangletin a rawn tan tlat a ni. Sept 5 khan The New York Times chanchinbu darh zau zetah chuan hming ziaktu awm lovin “Article” thinti thawng zet tihchhuah a ni a, chu thil chuan Donald Trump pawh a tithinurin, Trump Admin inner-circle a barakhaih hle a ni. Chu article chu White House a “SENIOR OFFICIAL” pakhat ziak anga tarlan a ni a, “I am part of the Resistance Inside the Trump Administration” tih a ni.

He article hi thenkhat chuan Vice Presdent Mike emaw Secy of State Mike Pompeo ziak ni turah an chhui dawn nghe nghe. Mahse, anni pahnih chuan hetianga thuziak an neih loh thu sawiin, “Trump Admin beihna a ni,” an ti.

Hetiang hming ziak lan loh article ang hi hmanah pawh Mizoram chhungah “Zoram Khawvar hun nghakin” tih lehkhabu hralh kal leh chhiar leh sawi hlawh zet mai a chhuak tawh a nih kha. He article ziaktu hian “25th Amendment” dan angin President Donald Trump chu ami mite ngei, a khawnbawl upa leh fatu leader-ten White House atanga paih chhuah an tum angin ziak a ni a, “Donald Trump chu rilru lamah White House luah tlak lo, anti-Trade leh anti-Democratic niin, a rorel dan chu effective awm lo, office luah zel tlaklo leh mahni duty leh mawhphurhna hlen chhuak zo lo, chhang ur hmin loh leh thil hrechianglo (half baked, ill-informed and occasionally reckless decisions)” tihte a ziak a ni.

He thuziak hi Vice President Mike Pence chuan na taka demin, “US economy par chhuah mek leh Trump-a hlawhtlinna tih thuanawp tumna a ni” tiin, Zirtawpnia President hlui Barack Obama’n thalai rual University zirlai zinga President Donald Trump chu hming hmer meuhva a mimal taka a rawn bei chho chiam pawh chu demin, “Obama hian President hlui a nih anga che lovin, kum 8 kalta chhunga thiangzau taka ngaihdan a lo kal puina chu a sawi a ni” tiin, Fox News-Sunday hrilhin a a dem thu a sawi bawk.

President Donald Trump chuan Barack Obama’n a beihchhoh dan chu TV atangin Live-in a lo thlir ve vung vung ni ngei tur a ni, “Ka mut a tichhuak mai mai e” tiin a rawn tweet thung. Thenkhat chuan Donald Trump chuan thutak hla tak a ngaithla duh lova, a nupui Melania erawh chuan thutak te chu uluk takin a lo chhinchhiah kauh kauh a ni, an ti. Tunlai chu President Trump an beihna an ti nasa zual hle.

The New York Times chanchinbua “Op-ed” article chungchang chu President Trump chuan Twitter-ah “Hnam phatsana thil” (TREASONS, GUTLESS” tiin a rawn tweet a, “He thil hi New York Times chuan National Security thil avang tal pawhin, vawikhat na reng reng chu an tarlang tur a ni” a ti.

Sarah Sanders, White House Press Secy chuan, Donald Trump thlavang na taka rawn hauh bawkin, “Maktaduai 62 vote hmuin, Electoral College votes 306 leh 232 inhnehna chu inthlau tak a ni. Hetiang thuziaktute hi thiangzau chanchanchinbu mi leh President Trump hmingtha tak tih bawrhban a, tihhmingchhiat tumna mai a ni” a ti.

Sept 11 a release tur “anti-Trump book” ti mai ang, “FEAR: Trump Inside the White House” tih Bob Woodward a ziak pawh anti-Trump hote chuan an ngaihven hle a, he lehkhabu hi President Trump chuan “Dawt muhlum phuahchawp leh thulakna mumal awm lo” (lies and phony sources) tiin, a sawi bawk a ni.

Ziak tawh thin angin Nov 6 ah US chuan mid-term election an nei dawn a, he hunah hian Democrat hote chan House thunun let ngei tumin, nasa takin campaign an bei ngawrh hle a, chumi atan an hmuipuipu Barack Obama pawh thalaite chawk thova Election Day-ah vote thlak uar tura sawmin, mawng vawmba ang sekin a campaign mek a ni@CT Lalrinawma/ Special Report