Mizoram Thilthleng Rapthlak le Hrilawknak

MIZORAM AH THIL RAPTHLAK: Tunai ah nuhmei pakhatin a fapa thil tawn thuhla a relsuah mi rapthlak tak cun tulai Mizoram khawvel a luah nasa. Thil umdan cu: September 7 zan khan Aizawl khawpi, Zarkawt veng ih nuhmei Pi Lallianzuali fapa Zothansanga& a hawipipawl le Zodinliana Sailo (Mizoram CM hlun Bri. Ṭhenphunga ih tupa) phuaih cu malte an tibuaiaw ih Zothansanga ih u khal hliamhma malte a ngah ruangah Sikhan an fehpi ti a si. Cutin ngaithiam an dilaw ih an remawk hnu ah Zothansanga leh a rualpa cu lamzin kapah toih an um laiah Zodinsansanga Sailo le a rualpi 3 cu mawṭaw thawn an ra kir ih nam le pistol keng phahin Zothansanga rualpa cu mawṭaw sungah an dir lut ih an tlanliam pi.

Reilote ah an ra kirsal ih Zothansanga cu an ra kaiih mawṭaw sungah an khum ve hngal. Cutin Lunglei zin, Thenzawl fehnak (World Bank bawmnak thawn tuah a si ruangah World Bank Road an tih mai) ah an fehpi ih, Pistol thawn tin phahin, “Nang cu na ralṭha nasa, na rualpa cu mawṭaw in a dawp ih nang cu dawp loin na ra vivo ih ziang a cang ding tin a thei leh ding” an ti. Cun mi umlonak an thlen an dekcawk ih an duhduhin an tuah. Cuhleiah mipa-mipatnak khal an hmanpi. Cutin zanvar an dekcawk hnu ah an tlansan. Khawvan hnu ah thilphur mawṭaw a rak dil ih cutin a tlung.

Cutin Sikhan an piah tikah dawkṭha cu, “pawngsual(sexually molsted)” tiin reference a tuah. Palik hnenah thubuai an thehluh tikah palik in an rak pawm lohli duh lo.

Tu hi Mizoram ah cun hi thu hi an buaipi nasa. India ah cun pawngsual hi ‘case’ sang tak a si. Cun Zothansanga hin a taksa lawng si loin a thinlung lamah harsatnak tumpi a tawng. Zan a itthat thei lo, rawl a ei thei lo, a lengsuak ngam lo ti a si.

Cuhleiah tu hi hrilawk zik a si ih Pu Ṭhenphunga ih tupa in hivek thilsual a tuah hi Pu Ṭhenphunga tei sungkaw party an tih mai PC le ZNP ṭuantlangnak Zoram People’s Movement (ZPM) hi a tisiat phah kei maw ti hi an phang nasa. Thilsual tuahtu parah hremnak pe dingin mipi in an phut nasa.

MIZORAM HRILAWK BORUAK: November 28, khi Mizoram MLA(Member of Legislative Assembly) hrilawknak a um ding. Mizoram Assembly member 40 lakah MLA 21 neitu cun acozah an tuah ding. Party pakhat in MLA 21 an neih lo le ṭuantlangin acozah an tuah ding. Paty dinhmun mal lai zoh sehla:

1. MNF: Mizo National Front hi Pu Laldenga din mi a si ih acozah vawi thum an tuah zo. Tu ṭumah acozah tuah dingih rinbik a si. October thla ihsin Congress Party ihsin nitin deuhthaw MNF ah mi lut an um ring ring. Congress Party ih an mi rinsan Pu R Lalzirliana (GS & Minister), Pu Lalrinliana (Vice President) Pu Lalthanzara(Home Minister) pawl hruaitu lar tamtak cun Congress an suahsanin MNF ah an lut. Congress hruaitu tam tak MNF ah an lut. Asinan an President Pu Zoramthanga cun ‘Mau’ a rel phur nasa lai.

2. Congress: India National Congress, Mizo Pradesh Congress Committee party Pu Lalthanhawla ih kaihhruai mi hi Mizoram ah vawi 5 hriltlin an si zo. Tu ih acozah lai khal an si. Asinan an boruak a se nasa. Vice President, General Secretary, EC hrekkhat bakah hruaitu tampiin party an suahsan. Assembly speaker khalin Congress suahsanin BJP ah a lut. Pu Zorama cun, “Pahmei thinkhawn chimin a chim hem hem mai” a ti, cuhleiah, “Congress cu ICU (Intensive Care Unit/Mina besia retnak) ah a awm mek” a ti. An sum sem NLUP an rel thaw nasa lai. November 20 ah Central President Rahul a ra tlawngih an party an tlin a zum zet nan central khalin siat lam pan vivo Congress cu an tlin a rinum lo nasa.

3. ZPM: Zoram People’s Movement hi tui kum sungih din a si ih Pu Lalduhawma ih kaihhruai Zo Nationalist Party le Peole’s Conference bakah thuthang lamih mi hminthang Pu K. Sapdanga(Vanglaini), PL Liandinga (LENGZEM), Vanneihtluanga(Writer) le kawhhran hruaitu tla an tel hnuaihni. Unit le block cu Congress le MNF vekin an nei tam lo nan Independent vote tampi an lak zum a si. MNF lo ah cun mipi rinbik an si. CM dingah Pu Lalduhawma ruahman a si. MNF le Congress ning tuk pawlin an pan nasa zo. Online le Facebook lamih mipi ngaidan laknak ah cun party dang an hleih neknek. Annih hi cun sum zem an duh lo, eithupnak an do, sawhthing an rel mawi nasa.

4. Rev. Dr. LR Colney in MLA Cuh Tum: Orissa tiduhdahnak ruangih chin zumtupawl theih emem, M3 Mission Conference, MEF Conference, Wesleyan Church Mission Conference le GBC Tahan, etc… pawlin Speaker dingih an rak sawm zo mi Missionary L R Colney cu BJP ihsin MLA a cuh ve ta riai. BJP hi Hindu mi luarkaipawl tamnak a si ih Mizoram hrang le Khristian hrang ṭihnungah an rel ṭheu mi a si. L R Colney cun, “BJP in Khristian an tiduhdah ka thei dah lo. Orissa tiduhdahnak khal kha Congess acozah lai thil a si” a ti ve tlat.BJP ah hin rawngbawltu 4 in MLA an cuh an ti. Ziang tak bang vivo kei maw?

India ih kan miphun, kan unau, Myanmar Chinmipawl ih lo fehnak si ṭheu Mizoram ih thil thleng hi kan kiangkap ih thil thleng vek thotho a si ko lo maw?

Credit: Jed Zuala Cawnghlut ih Facebook Wall Post laksawngmi a si.