Myanmar Dânpui 2008 A Ruh Lang Hawkin Aw

Constitution (2008) Amendment Bill Chungchang A Ruh Lang Râwt, A Thlîng Baw Hawkin Aw

NLD Party-in Pyidaungsu Hluttaw-ah Constitution Siamṭhatu tur Joint Committee (Constitution (2008) Amendment Joint Committee) din tur chungchang Bill an theh lut thut mai a. Chu chu January ni 29 kha a ni. An rawn theh luh dan kha tih dan phung (procedure) nena inmil miah lo a nih avangin Sipai palaiten an han kalh ngial a, mahse, vote lak a ni a, thlawptu vote a tam zawk avangin Bill chu pawm a ni ta a. (Constitution Amendment Bill theh luh dan tur chipchiar hre duhtute chuan Section 433, 434, 435 te kha in lo chhiar mai dawn nia).

Constitution siam ṭha tur hian Palai 75% chuang thlawpna a ngai a, chu mai bakah Section ṭhenkhat siam ṭha tur phei chuan ram mipui vote lak hial a ngai a, vote nei thei zawng zawng (vote thlak pawh thlak lo pawh) zatve aia tam thlawpna chauha tihdanglam theih a ni (Section 436 (a) (b) ). Chuvangin, Secret Ballot-a vote thlak hunah party tin palaite lo inthurual vek pawh ni se Sipai palai pakhat tal vote an mamawh ta a ni.

NLD Party hi lian an inti tawk a, chuvangin, party tenau zawkte an be ṭha duh ngai lo va, an tuang an tihchhah khum ṭhin avangin party dang reng rengin NLD party hi an ei tehchiam lem lo a ni. Chuvangin, sipai palai vote sawi loh, thlan tlin palai vote zawng zawng hlawm khawm tur pawhin vân êkkhum tum tluk deuhthawin a harsa a ni. Pyidaungsu Hluttaw-a party tin palai neih zat chu:

1. NLD 59 %
2. USDP 5 %
3. Tlangmi party hrang hrang 11 %
4. Sipai palai 25 %
——-
Belhkhawm 100 %
He ti hi a ni a, NLD hian Constitution siamṭhat nana 75% chuang vote hmuh an tum a nih chuan a hma aṭanga sipai palaite an lo biak rem lawk a ngai a ni. Mahse, Committee din tur chungchang an put luha Sipai palaiin an hnial kalh ṭauh ṭauh a, vote an thlak duh miah loh kha ngaihtuah chian chuan NLD leh Sipaite kara inthurual lawkna a awm lo chhiava a ni tih a rin mai theih a ni.

Heti khawpa hlawhtlinna chance tlem si, an sawrkar term tawp lam, chawhnu her bawih hnuah hian NLD hian eng vanga Constitution siamṭhat hi rawn rawt leh ta thut nge an nih ang le? An â ta thut em ni? Ni teh suh e! Nakkum 2020 lawk khi inthlanpui a ni leh tawh a, mipuite hîp nana an tih a ni tih a rin theih nghal mai lo em ni? Inthlanpui lo awm tur atan hmakhua an insial lawk tih a rin theih nghal lo em ni?

An sawrkar ṭantirh ata vawiin thlenga an hmalakna fumfe hriat tur leh hmuh tur a awm lo va, mipuiin an ring ngam tawh lo tih inhre tur khawp chuan thluak an nei ve a lawm. Chuvangin, Foreign-zini pawhin ram chhung a fan chiam chiam tâk hi. 2016 kum an sawrkar tirha kamsir var buah khawpa an sawi ṭhin remna leh muanna lah chu Mu nei lo Laipui ang mai a ni ta si a.

Economy lamah lah Zoram Zuanglawra khabe sêp ang maiin lehkha phêkah chuan ziak tlawr ve teh mah se beisei ang hêhûin foreign investment an tih ram dang aṭanga sum peipunna lah lo lût zung zung ta hek suh. Hmeichhe lerh dang nâl ṭawngkam thiam satliah puarpawlêng ang chauh an ni ta si a. A taka hmuh tur awm ta hek suh. A taka hmuh tur awm chiang em em chu brake fail ang maia thil man sâng chho par par leh hna thawh tur vâng lutuk chauh hi a ni ta si a ni. NLD huna Myanmar economy chhandam thei awmchhun chu China chauh a ni ta si. China lahin Myitson Tuikhuah a thawh chhunzawm dawn loh chuan chêt a tum eih si lo. NLD lu bûr chu a hai ta map map mai a ni.

Hetiang boruakah hian anmahni thlawp ṭhina nguai zo ta mipuite tiphûr thar leh tur leh Tlangmi Ralthuam kengte thlâwpna an hmuh theihna tur chuan Constitution Amendment, hlawhtlinna chance awm mang lo hi an rawn apply ta a ni tih ringhleltu chuan Psychiatrist an tih rilru lam doctor pan se a tihfuh ber a rinawm.

2020 kuma lo awm tur inthlanpui tan dan mila campaign theih a la ni lo va, chuvangin, campaign lo ang tak siin Constitution Amendment chhuanlamin, a pehhêl zawngin an campaign mek a nih hi. “Constitution siamṭhat tak tak duhtute chuan 2020 kum inthlanpuiah khian NLD vote loh theih a ni lo” tih rilru mipuiin an put theihna tura mipui hip nana Constitution Amendment Bill hi pu lut ta thut an ni tih hai chi a ni tawh lo.

2015 kum inthlanpui atan pawh khan danin campaign a phal hma hma Constitution Section 59 (f) leh Section 436 siamṭhat chungchang chhuanlamin 2014 kum aṭangin an campaign ṭan a. 2015 kum a lo thar dêk dêka Aung San-a kum 100 tlin birthday ti na maw, Aung San-a cinema film ti na maw, danin a phal hma hmain a pehhel zawngin an lo campaign lawk chiam tawh kha. Kha mi tactics bawk kha kawng dang dapin tunah an rawn chet chhuah pui leh a nih hi.

NLD hian rilru thianghlim takin Constitution hi siam ṭhat an duh tak meuh a nih chuan USDP hun lai 2015 kum, July ni 8-a Pyidaungsu Hluttaw-in a nemngheh Constitution siamṭhatna te kha hman theih mai turin tinung phawt ang hmiang.

Kha mi ṭum khan Region leh State te tana Dan siam theihna leh chhiahkhawn theihna bulpui zauhsakna chi 54 ngawt nemngheh a nih kha. 2015 kum, July ni 15-ah Pyidaungsu Hluttaw Dan Section number 45 behchhanin Constitution Amendment a nih thu President U Thein Sein-a’n hming a ziah hnan kha. Mahse, a taka hman a nih theihna tur chuan “Union Dan mila tih tur” tih a nih avangin Pyidaungsu Hluttaw aṭangin Region, State zawng zawng tana Dan intluk tlang vek siam a ngai ta a. Inthlanpui a hnaih tawh em avangin puitlin hman a ni ta lo chauh a nih kha.

Chuvangin, siamṭhat tawh sa Constitution pawh tihnun tum lova term tawp dawn ruaia “Constitution Siamṭhat” rawn tih ve leh ruai mai pawh chu 2020 kum inthlanpui atana mipuite hipna tactics tih hai chi a ni dawn em ni?

Credit& c/p Pu Samsona Hmar

2 Comments

  1. Samsona Hmar thuziak mai mai hi chu engah mah ngai duh suh u… Thudik chanve leh a ngaihdan/pawmdan nen a rawn bawlphuan vel mai mai nih hi… Post laktlak loh…

Comments are closed.