Myanmar ralkap pawlin mawhsualnak neilo Chin pitar an kap that

Tufang Chinram, Paletwa pengsung ih Rakhine tapung le Myanmar cozah tapung pawl an kapawk thu cu zokhal ih theih ṭheh a si bangin, Chinram Paletwa peng sung cu ti-rawl ei-in ding harsa zetih vansanglam ih an um tlun ah, an umnak khua le inn suahsan in an sahimnak hawlin an vakvai rero. Myanmar ramsung Chin mipi in hivek harsatnak an tuar rero lai ah Myanmar cozahpi cu mitcaw le hnaset, kut kiak men bangin zianghman a cangvaihnak thu theih ding a um hrih lo.

December 8, 2018 ah Myanmar cozah ralkap (Tapung) cun Chinram sungih Paletwa pengih khua pakhat ah an thlengih khawsung inn tin ah lutin Myanmar ralkap cun fang an khawng vivo, tiah tualsung um mi pakhat cun a sim. Chinram Paletwa ram sungah ralbuainak a um ih tualsung mipi pawl hman ei-in ding an harsa ti laklai ah Myanmar cozah ralkap (tapung) pawl cun tualsung mipi thil an lawng timi cu riahsiat za taktak a si.

Cutin Pitar pakhat rethei zawnzai zetih inn ah Kawl cozah tapung pawl cu lut in fang an khawng ve. Hi pitar hi mi rethei zet a si ih, hawl cawp ei cawpte a si. Hi pitar hi khaw leng deuh ah a um ih, khawsung mipi pawlin hi pita rei-in ding hi an pek cawpte ih khawsa mi a si.

Myanmar ralkap (tapung) pawl hi khawsung ih paisa, fang le ei-in ding an khawng ṭheh hnu ah khawsung an suahsan zawngah pitar ih inn hi an hmu ngah ih pitar khal cu khawsung mipi dang hnen ih an dil/khawn mipawl an khawng ve, tiah an sim. Asinan pitar cun “zianghman neihmi ka neilo, khawsung mipi ih cawm cawpte ka si” tiah a sim. Asinan Myanmar cozah ralkap (sen hnih hrawng a simi) cun pitar nu hin in bum a si tiih meithal thawn pitarnu cu a kapthat.

Myanmar ralkap pawl hi (ခမရ) ၃၇၃တပ္ရင္း an si. Tuvekin Myanmar cozah siseh ralkap siseh, thuneitupawl khalin Chin mipi in dekcok ih in that rero ti laklai ah ralkap bawibik Min Aung Hlaing hnen ah Paralṭha Lawmman rak petu khal an um ve thotho.