New York Khawpi cun Khawsung ih um Naute suak pekte pawl Gender (Mipa/Nunau) silo a dang bet

Leitlun sualralnak hi a va pungcak lawmam em. Hlanlai ih Sadom le Gomora ai hman hin tuisan ih kan khawvel sualralnak hi a nasa sinsin thlang. Pathian ih a sersiam dan duhlo in Pathian dokalh zawngin minung hin sual phunphun an tuah. Pathian in Mipa le Nunau lawng a rak sersiam na cingin minung pawl cun Mipa le Nunau tlunah Serh (Gender) dang an neiter bet.

Kum 2019 a hung kim curco cun U.S ram ih New York khawpi cun, New York khawpi sungih a um mi zo poh cun Naute suakpek an neih tikih Birth Certificate ih cuang/lang ṭheumi, Male | Female (Mipa|Nunau) timi ah, Mipa khal asilomi Nunau khal asilomi serh dang (X) timi an bet ih, 2019 ihsin hman thok a si thlang ding.

Mipa cu (M) ti asi ih Nunau cu (F) ti asi, asinan Serh (Gender) thar hrangih an phuah tharmi cu, (X) ti a si. Hivekin (X) an betnak hi, minung kan suah pekte ah Mipa, Nunau an si timi fiangten theih a si loih Mipa ih a rak suaktu tla Nunau si an duh thei, an upat tikah an duhduh an hmang theinak ding hrangah le transgender a tuahtu hrangah, curuangah himi (X) hi belh a sinak a si, tiin NYC Health website cung an tarlang.

Mipa (M) le Nunau (F) tlun ih Serh (Gender) relnak hrangih (X) belhmi hi New Yorker (New York khawsungmi) pawl hi a hmang hmaisabiktu an si ding. January 1, 2019 ihsin hmang thok a theih thlang.