Ngapih Lei Hngilh ruangah Rualvah hnih thukam elaw in an thataw

September 21, Zigone: Bazar ih Ngapih lei hngilh pang ruangah a hnaṭuanpi rualpi thawn thukam elawknak a suak ih thahawknak tiang a suak tiah thuthang theih a si. September 21 zing nazi 8 hrawngah bazar kaitu pakhat cun Ngapih a lei hngilh ruangih hivek cangmi a si.

Bazar kaitu, kum 17 hrawng mipa tleirawl cu Kohhmo bazar ah thil a lei, a bazar ṭheh ih hnaṭuannak hmun a thlen tikah Ngapih a lei hngilh thu theih a si. Cutik ah a hnaṭuanpi Kyaw Thet Aung @ Zaw Thet Aung timipa kum 18 hrawngih upa thawn a Ngapih lei hngilh thu ah thukam an elaw ih bazar kaitupa cu a thinheng tuarloin kaihci thawn a rualpa Kyaw Thet Aung cu a dawt.

An rualpi dangpawl in an ṭhen rero lai ah, an dawr ih an zuar laimi namte la tahrat in a rualpa cu a dawt bet. Nam thawn dawt a tuartu Kyaw Thet Aung khal cun a pum ih nam dawtaw cercer cu a phawi zuarzo ih a dawt tupa cu a sat/dawt ve.

Cutin bese zetin an pahnih in hliam an tuarih Sizung ah fehpi cih an si nan, Kyaw Thet Aung cu a hliamtuarmi a besiat tuk ruangah sizung ah a thi. A dawttu pa cu a thilo nan, hliam na zet a tuar ruangah sizung ah tuamhlawm rero lai a si.