NLD Motion hi A Tlang Meuh Ang Em?

Ram danbulpui siam that vat a nih theih nan party hrang hrangte thawhhona committee siam tura NLD motion put luh chu sipai lam chuan kalphung pangai anga thil ti lo nia puhin an duh lo hle.

Hluttaw chhunga sawihonaah he motion hi dan kalhmang palzut lutuk leh thleibik neia putluh a ni tih sipai lam atanga palai General Maung Maung-an a ti a. Chutianga tawngkam mawi lo tak a hman avangin Hlawttaw hruaitu U Khun Myat chuan a khak nghe nghe.
Dan draft (motion) an put luh hi Hlawttaw pahniha sawiho a ngaih dawn avangin Committee din hmasak a nih chuan chû committe chuan a duh lai lai thlang chhuakin siam that ngai list-ah an telh ang tih sipai lam palaite hian an hlauh avangin he motion hi an duh lo a ni ber.

He NLD motion hi sipai lam chuan an lawm lo hle a. Hluttaw-in sawiho tur zingah a telh dawn em tih vote an thlak dawn meuh chuan boruak a tang hle. Sipai lam chuan ding meuhin an duh lohzia an sawi a, tum danga awm ngai lo, Chairman-in a vau daih ngai hialin boruak a sang a ni.

Hlawttaw chu NLD party kaihhruai a nih ang ngeiin vote an thlak meuh chuan sawiho remti lam vote 394, rem ti lo vote 17 leh newtral vote 3 a ni a. Tichuan he motion hi sawiho turin ruling party chuan a hneh ta a ni.

He motion – Dan Bulpui siam that nana committee din tur thu hi Makwe Division lam atangin U Aung Kyi-a put luh a ni awm e. Amah U Aung Kyi pawh hi politics avanga jail bang lo zut tawh, a chhuah hnua NLD party tana inthlan tum thum a hmachhawn pawha tling zat zat a ni. Pa tawk ve tak chu a ni.

Dan bulpui siam that hi NLD party au hla ber, an vote zawnna ber kha a ni a. Sorkarna an lak tirh lamah an duh angin an bawhzui hman bik lo va, an sorkar atanga kum 3 hnuah hma an rawn la tan ta a ni ber mai.

Motion put luh tâkah hian dan number engzatna te nge siam that ngai tih lam engmah chiang taka kawhbik tarlan a ni chuang lo. Mahse, tuna kan dan hman mêk, 2008 Dan Bulpuiah hian democratic taka Union din a nih theih nana daltu, party tin huap zo zawnga democracy kalpui daltu leh a ram mite intluktlanna daltu a awm nual thu U Aung Kyi chuan a sawi a. Chu bakah heng pawimawh pathum din nghehtir thei lotu leh ram pum huapa inthlanna a lo awm pawha dikna kenkawh hleih theih lohtirtu dante a la awm zel niin a sawi bawk.

Hetianga dan tihdanglam tur thu a lo rik hlet hi chuan mipui leh Hluttaw zingah Dan No. 59 (sahlung) leh No. 436 te hi a lo lang lo thei thin lo niin an sawi a ni. A hmasa zawk khi Presidential status hrilhfiahna, ram dang mi nupui pasal neite chu ram hruaitu an nih theih lohna dan (Pi Suu Kyi hrekna) a ni a, a hnuhnung zawk khi chu Dan Bulpui siamthat nan 75% aia tam vote hmuh a tul thu ziakna kha a ni.