Operation ih Naute neih ding a Pasal sungkua pawlin an duhlo ruangah mahte thataw

Nunaupawl hi zangfak an va um tak em. Ṭhen khat Mo (nunau) tla cu pasal Nulepa in zoh ṭha duhlo, zawng-um zoh ih zoh, pasal farnu le pawlin an hua, ṭhen khat tla cu pasal farnu ih velh tuar tla an um rero, inn lamah ziangkim tuangtimtu an si, pasal sungkua mithmai zoh ṭul. Cuhnu ah harsa zetin Naute an vun nei bet. Hivekih harsa an um lai ah, ṭhen khat nunau an sile pasal kha ṭihzah hna thiam lo, pasal nulepa, pasal sungkhat khal ziangih siarlo an rak um ve lala.

Nunau asilole Nupi hi duat an rak ṭulzia le enkawl ṭhat an ṭulzia hi a thupi tuk. Sibawi thiamsang ih an simnak ah, Nunau in naute a hrin tikih a pumna khi, minung kan ruh pahnih kiat tlukin a naa tiah an sim.  Nupi a duat thiamtu cu anmah an hlawk laklak men khi a rak si ziar.

Tuiṭum thuthang hi mak danglam tak cu si, ziangtlukin so a thinnat ih a riahsiat ding? China ram ih Nupinu pakhat, kum 26 mi cu nau a pai ih a hrin thla a cu thlang, a pumsung ih naute cu a tum tuk ruangah normal in nau a hring theilo ding ruangah operation a ṭul tiah sibawi cun a sim. China ram ah hin ziangvek dinhmun an si khalah Operation ih nau neih ding cun pasal sungkua ih lungkimnak lakta tengteng a ṭul.

Hi China nu naupai khal Operation ding a si vekin a pasal sungkua pawl hnen ah a dilnak le sim theihnak a nei nan, a pasal sungkua pawlin an lungkim ta riai lo. Sizung an um lai ah sibawi rori ih a simmi cu a sungkua pawl khalin an thei, amah khalin khukbil in vei hnih rori a dil nan, operation loin normal te ih nei dingin hramhram in an fial thotho.

Sibawi in le a pumsung ih um Naute hi a Lu a tum tuk ruangah a suak theilo ding, operation ṭul tiih a nemhnget zomi a si fawn. Naupai’ Nu cu a thinhar le ninghang riahsia mangbang anhai tuar loin, sizungpi dot 5 nak ihsin a dawp ih, amah khal siseh a pumsung ih um naute khal siseh an Nufa in an thi cih tiah an sim.