Salai Lung Thi Tum Hi Amah A Diklo Ruangah Pu No Than Kap le Pu Zo Zam A Sawiselmi a si

Atufang kan Chin miphun lakih politics borhhlawh tak a suakmi Salai Lung Thli Tum in CNLD hruaitu lakih mi pahnih Pu No Than Kap le Pu Zo Zam a simsiatnak thu thawn pehpar in thuhla fiangfel takih kan zoh asile, Salai Lung Thi Tum hi amah hi mi diklo a si ruangah Chinram ah Chin Party in nehnak co in an lal ding ti a phang tuk ruangah atu vekin a rak aukio mi sawn a si.

Ziangruangah hitin kan sim thei ti asile, amah lala ih canganmi hmangin kan zohtlang ding, Lung Thi Tum ih nganmi * Lu pathum a ngeimi CNLD nih teinak an ngah i cozah an ser sual cun kanmah pawl cu Hakha kan tlung ngam ti rua lai lo, meithal kah kan tong te rua lai.”hitin a sim hi ruah ding tamtak a si. Ziangruangah CNLD in nehnak an co ruangah anih Lung Thi Tum Hakha ih a tlung ngamlonak ding san? 2010 – 2015 tiang Pu No Than Kap cu Chin Affairs Minister a rak si, diklo in a tuahmi ziang a um? Diklo in mipi a eirukmi le mi a hmuhsuamnak ziang a um? Pakhat hman theih ding a um lo. Chinram ah CNLD a lal ruangih Salai Lung Thli Tum Hakha ih a tlung ngamlo ding timi cu amah Lung Thli Tum hi mi diklo, thil ṭhalo a tuahtu, illegal ih thil tuah hmang a si ruangah atuvekin CNLD an tling ding hi a ṭih tuk a si pei maw, timi cu ruah ding a um.

Amah Lung Thi Tum nih a simmi ah “*** meithal kah kan tong te rua lai” ati, mi dik, felte ih a nungcang mi, legal ih hnaṭuantu cu zo nih a kap ding? Zonih mawh a thluk ding? Kah a ṭih a si ahcun amah kha mi diklo a si timi a langfiang tuk.

Lung Thi Tum

Ngai ngai ten kan sim asi ahcun Salai Lung Thi Tum in Pu No Than Kap le Pu Zo Zam a soisel ve timi cu Vuipi a feh reromi butlak in lamzin sir in a rak bo rero tivek hrawng khi a si. Pu No Than Kap le Pu Zo Zam ih kebeu hman a banglomi pa in hivekin a soisel ve cu, Chinram ah CNLD a tling ding hi a duhlo, atufang Chinram acozah hnaṭuan sang kaitu thawn hnget zetin pehtlaiawknak an neih ruangah covo ṭha a neih ruangah, cui a covo ṭha hloh ding a sianglo ruangah a si ko. Hivek lungput neitu hi Chinram zuartu tiah hmin vuah theih a si.

The Bungpi Post media ih an ngan bangin, hivekin amah ih banglomi a soisel hi ralṭha ah a ruatawk ih mifim ah a ruat awk. England ih tlawngkai a si ruangah miin in ngaisang tiah a rak ruataw sual pang, amah level hnakih sangah amah le amah a rak retawk pangmi sawn a si. Amah hlan ah England ih tlawngkai, cathiam le mifim tawrleseng an um, daiziar ten an to men. Fim tukih ruatawk hi mi nih zianghman ih siarlonak a si sawn.

Ṭongnak ah minung cu mi famkim kan umlo ti a si ih, kan Chin pacangṭha pahnih Pu No Than Kap le Pu Zo Zam khal tlinlonakte le tlaksamnak an nei ve ko ding. Asinan an tlinlonak le an tlaksamnak maw, an tlinnak, an thilti theinak a tamsawn timi kan zoh thiam a ṭha. An tlaksamnak le an tlinnak kan khaikhin a si ahcun an tlaksamnak zate khat a si lai ah an tlinnak cu sumpi khat a si ding.

Salai Lung Thi Tum hin Pu No Than Kap le Pu Zo Zam ih sinak le an sunglam nunzia taktak hi ṭhen 20 ih ṭhen hrek hman a thei ziklo. Mi ih sim cawp, mi ih an relmi a theihmi menfang a si ding. Lung Thi Tum hi Pu No Than Kap le Pu Zo Zam ih sinak le lungput diktak thei dingin an hnen ah, Nazi ziangzat sung, Ni ziangzat, Kar ziangzat, Kum ziangzat sung a um dah? Mifim pawlin, “kan kiang naivai ih a umtu pawl hi kan sinak diktak in theibiktu an si” tiah an rak sim. Pu No Than Kap le Pu Zo Zam ih kiang naivai ah um si loin ziangtin an lungput le thinlung a thei thei pei? Theilo pi in maw a soisel men? Lole mi ih an tukforhmi a si ko lo pei maw?

By the way, Salai Lung Thi Tum le Chin ramkulh NLD ukaṭah Zo Bawi khi khaw khat, sungkhat an si an ti. Curuangah Chin ramkulh ah CNLD a tling asi ahcun Zo Bawi a tling nawn lo dingih Salai Lung Thi Tum hrangah dawhhna (sa-kuat) a um nawn lo ding. Cucu Lung Thi Tum in a rak hmuh cia raungah Pu No Than Kap le Pu Zo Zam a run soiselnak a si. Cucu Chinram duhdawttu si loin Chinram zuartu sawn a si.