Singapore hnen-um in Naute a that ruangah kum 7 thawng thlak

Singapore ram ah hin ram dangdang ihsin hnen-um hnaṭuan in a khawsatu minung ziangmaw zat an um ih, cupawl lakah hnen-um hnaṭuantu tambik ram pawl cu Indonesia, Myanmar, Philippine le Vietnam pawl an si. Hi hnen-um hnaṭuantupawl hi mi ṭhen cu nuamaw zet, lawnglak zet le thawveng zet an um lai ah, hrekkhat vethung cu ti le rawl hman khawpkham ei ngam loih rethei le harsatnak tuar an um vethung.

Singapore rampi ih thuṭhennak hmunpi cun Indonesia hnen-um pakhat in a naute ummi a ti thih ruangah November 22 sun ah kum 7 sung thawngthlak si dingin a thuhla an relcat sak, tiah theih a si. Hi thubuai hi kan dung kum lam ih thil rak cangmi a si ih Indonesia hnen-um hi Maryani Usman Utar tiih kawhmi a si, kum 25 ih upa a si ih, May 8, 2016 ah khan a Naute ummi cu zinglam nazi 2am le 7:30am karlak ah a thihtermi a si.

Thuhla umdan ah, Naute hi Ihkhun par ihsin a tla ih, a ṭap ciamco, ngam theilo in reo zet a ṭap ruangah a umtu Maryani hin a thinheng tuarlo le supaw theilo in Naute kum 1 mite cu a kut thawn a hngawngah a rek ih a beng ciamco. Naute hrangah thihnak thleng thei a si ti theine cingin a tuah thotho ruangah tihrimnak a si tiah ruah a si ih, hi ruangah naute cu a nunnak a liam a si.

Hnen-umnu Maryani hi a inntek te hin an zoh se loih ti-rawl khal khawpkham an pe ko nan, a Pinu hin a thupten a thlingthla ringring a si hmang. Shopping dawrpi ih an fehnak ah innteknu hin hnen-umnu hi mi lakah a rak kawk dah si hmang, cumi in hnen-umnu hi ningnatnak a thlen ih a Pinu parah lungkimlonak a suak.

Hnen-umnu Maryani hi tuihlan ah hnen-um hna rak ṭuan rero dah zotu a si ih, tuihlan ah hivekih cangsualnak maw, a thuhla mawilonak khal zianghman a rak nei lo. Tuihlan ih hnen-um hna a rak ṭuannak inntek te hi Saudi Arabia an si ih an ṭhat zet thu khal a sim ih tui a inntek te thaw cun lei le van tlukin an thlauaw tiah a sim.

Tuvekin hnen-um Maryani in a hngawng ih a dekmi naute cu sizung ah fehpi cih a si nan, a nunnak runsuak manlo in a thi. Naute thattu hnen-um khal a ni lala ah an kai cih ve. Lawyer hmangin an cangvai ih kum 1 lenglo hnu, November 22, 2018, ah naute thattu hnen-um Maryani Usman Utar cu kum 7 sung thawngthlak dingin an relcat. Asinan a thawngtlak ni le can hi sualnak a rak tuah ih an kaih ni, May 10, 2016 ihsin siar peh ding a si.