South Korea Mipum tuk ruangah Phunsang Tlawngtapawl lo theihlo in ngaizawng awkter

South Korea hi kan theihlar zetmi a si ih, Korea film kan zoh rero ṭheumi pawl khal hi South Korea ihsi suahmi an si tlangpi. Film sungih kan hmuh vekin Korea pawl hi a taktak ah an rak si lamlam lo timi hi mipi in kan theithiam lo ṭheu. South Korea hi a lenglam an lang dan ah zoh mawi le felfai, duh thlaleng zet vek an bang nan an sunglam ah thin beidawngnak, sualralnak, buainak, thinharnak a phunphun thawn khawsami an si.

Pumcawmnak a harsa vivo, hnaṭuan ṭha ngah a harsa vivo asinan, umnak Inn man a khung vivo, leiram man a khung vivo, tlawngkai man a khung vivo tikah South Korea mino a tamsawn hi innsang din (nupi/pasal) nei ih fate neih ih khawsak hnakin, ziangtin ka tlawngkai man ka kuan thei ding, ziangtin inn man ka pe thei ding, ziangtin hnaṭuan ṭha ka ngah thei ding, timi ta rori an ruat nakah ngaizawng neih an man lo tiah an sim.

South Korea ram ah hivek harsatnak hi tufang mino tamsawn hnen ih a thlen rero ruangah phunsang tlawng (University) tampi ah innsang thu, fala tlangval thu, duhdawtnak thu, sex thu pawl zirhnak tamsawn an nei sinsin. Mino tamsawn in nupi/pasal neih, innsang din ih fate neih an duhlo ruangah South Korea mipum an ṭumsuk vivo tiah theih a si.

Curuangah South Korea ih phunsang tlawng (University) hmun tampi ah zirlai tlawngta pawl cu nupa sinak hman tlang, ngaizawng awk, fala lole tlangval pakhat in thla khat sungah kop pathum tal neih ding, a kop dang pakhat in a thik asile buainak a suah tikah ziangtin buainak cinfel dan ding tipawl zirhnak an nei.

An zirmi pawl practical, a taktak rorin an tuah ih an hlawhtling, an thiam thlang ruangah lo theihlo ih ngaizawng nei dingin an tinak a si. Kum tinte South Korea ah hin innsang din ih naute nei, nau piang a mal sinsin, nau neihnak ih cemkuan sumpai le a tam tuk fawn tikah naute neih an duhlonak a si. Hihin South Korea mipum a timal sinsin.