SUPREME COURT-IN “MAWNGKAWHUR-PATIL” TE ZALENNA DAR A KHAWNG RI TA

Sept 7, 2018(MSR): India ram Court sang ber, Supreme Court Judges 5 awmna-Constitutional Bench chuan British-in India a awp lai atanga dan a lo siam tawh, kum 158 zet a lo hman Indian Penal Code (IPC) Section 377 dan anga “Gay sex” hmangtute kum 10 hrem theihna dan chu hlipin, “Lesbian, Gay, Bisexual, Transgender” (LGBT) te tan zalenna dar a khawn rik sak ta. Nimina he thu Supreme Court in a puan lai hian, India rama LGBT thlawptute leh anmahni chu lawmin an tah nuih a, an inpawm vawng vawng a, thenkhatte chu Election Day a hnehtu ang maiin an lam phirsi kual vel chiam a, thenkhatin hotels leh restaurants ah te an lawm bawk.

British roreltute chuan kum 1861 khan, hetianga “gay sex” hmanna ang chi hi khapin, leilung dan lova hmeichhiat mipat hmanna (unnatural sex) tiin, IPC Section 377 angin kum 10 lung ina khung theih a ni. He dan hlih a ni ta chu, khawvela mihring tluklehdingawn 1.2 zet awmna India rama LGBTQ te chu an lawm hle. Supreme Court Chief Justice Dipak Misra chuan, “An mipat hmeichhiatna danglam bika en hranna chuan, an fundamental rights a bawhchhiat sak a ni” tiin, an thlavang a rawn hauh ta a ni. Khawvel ram 120 zingah “homosexuality” chu sual (criminal) anga ngaih a ni dawn ta lo a ni.

Khawvel ram 29 zetin “Same-Sex Marriage” a lo pawm tawh bawk a ni.

Kum 1990’s chho atangin “Gay rights” hi nasa takin LGBT hote leh anmahni thlawptute chuan an lo fight tawh thin a, Delhi High Court chuan kum 2009 ah “decriminilized gay sex” hi a pawm a, mahse, Sakhaw hruaitute ngenna (appeal) vangin Supreme Court in 2014 ah a rawn nem nghet (reinstated) ve leh a ni. Tunah erawh Sept 7, 2018 ah “Gay rights” chu a lo pawmpui ta a ni.

Official data tarlan danin, IPC Section 377 hmangin cases 2,187 zet chu, kum 2016 ah ziak luh a ni a, mi 7 thiam loh chantir niin, mi 16 hrem an ni. Ruling Hindu nationalist-BJP sorkar chuan Section 377 tihbo hi an duh lova, mahse, Supreme Court thutlukna siam chu fin thlak zawkah ngaiin, an pawmlo thei dawnlo a ni.

British sorkarin a awp ram Kenya leh Nigeria ramah chuan “gay sex” hman chu kum 14 lung in tan theih niin, Uganda-ah dam chhung lung in tan theih a ni thung@CT Lalrinawma, Mizo Special Report.