Tedim (Zomi) Association ih lawmman pekmi parah lungkimpilo tu tam sinsin

December 4, 2018 sun ah Tedim (Zomi) Association pawlin Myanmar ralkap bawi General Min Aung Hlaing hnen ih Chin Paralṭha Lawmman (Gal Hang Pah Tawl Na Award) an pekmi parah Chin Community dangdang le anmah Zomi/Tedim sung lala hman ah lungkimlotu an um ih an theihpi lo thu statement an suah a si.

Hi Chin Paralṭha Lawmman an pek thuthawn pehpar in Tedim (Zomi) Association ih Secretary U Kap Khin Pawng cu Zalen Media ih thuhla an sut tikah “…….anih (Min Aung Hlaing) cu rampi ih ralkap bawibik rori a si. Cui’ ralkap bawibik rori cu Paralṭha Lawmman kan peklo ah zawi hnen ah saw kan va pek ding timi ruahnak thawn kan pekmi a si. Anih cun kan rampi hi thlamuang zetin a humhim a si. Ziangtinkim ah hmaituang in in kilkhawi, in hruaikhawm ruangah, ziang khal sisehla ramsung ramleng in mawhthluknak le demnak a tamtuk laican, Christmas boruak ah thinnuam le hahdamtei’ a um theinak ding beisei in Christmas thucah va sim phah in hi Chin Paralṭha Lawmman kan pekmi a si”, tiah a sim.

Statement an suahmi

Tedim (Zomi) Association pawlkom in Min Aung Hlaing hnen ih an pekmi Chin Paralṭha Lawmman hi mipi pawlin an lungkimpilo men lawng siloin pawlkom hrekkhat khalin an theihpilo thu statement tiang an suah a si. Hi Chin Paralṭha Lawmman an pekmi hi Tedim (Zomi) Association pawlkom pakhat thawn lawngin a pehpar awmi a si ih Chinram ih pawlkom dang le mipi thawn zianghman a pehparaw loih kan theihpilo a si tiah an ngan.

Statement pakhat ahcun (a hnuai ih zuk hi a si), “….hivek ih Chin Paralṭha Lawmman an pekmi cu,,, Myanmar ramsung ih um taing-yinta (Tlangparmi pawl) rualremnak siatsuah theitu a si ih kanmah Zomi/Chin miphun thaw khalin zianghman a pehpar awklo thu”, statement an suah a si.

Statement an suahmi

Mipi lak ihsi khalin, kan Chinram rori ah tufang ralbuainak um rero cingin le kan unau Kachin pawl cimit ṭheh tumin kap rerotu, kan ram sungah remdaihnak zianghman a um lo tiih kana ihram rero lai ah, “rampi thlamuang zetih humhimtu” tiah ruatin Chin Paralṭha Lawmman an pek cu zo khalin an dem cio a si. Credit to Zalen.

 

1 Comment

Comments are closed.