Tedim (Zomi) Association in Myanmar Ralkap bawi General Min Aung Hlaing Lawmman pe

Chinram ih Tedim (Zomi) Association Pawlkom pakhat cun tufang Myanmar ralkap hotubik General Min Aung Hlaing hnen ah Gal Hang Pah Tawi Na Award (Chin paralṭha Lawmman) an hlan/pek thu theih a si. Tuvekin Myanmar ralkap bawi general Min Aung Hlaing hnen ah Chin Paralṭha Lawmman (ခ်င္းသူရဲေကာင္းဘြဲ႕) an pekmi cu mangbangza zet a si ih, Chin mipi tampi khawruah har in an um.

Myanmar ralbawi general Min Aung Hlaing hnen ih pekmi Chin Paralṭha Sunlawihnak Capi cu Chinram Tedim (Zomi) Association ihsin Catholic father a simi Rev. Fr. Joseph Thang Nen Zo Mung ih hohami pawlkom sungtelpawl cun mizansun, December 4, simlam ah khan Myanmar ram khawlipi Naypyidaw ih Ba-Yin-Naung-Yikta Hotel ah tawnkhawmnak nei in hi lawmman an peknak a si.

Ruah dingmi: Tedim (Zomi) Association in tuvekin Myanmar ralkap bawi general Min Aung Hlaing hnen ah Chin Paralṭha Sunlawihnak Lawmman (Gal Hang Pah Tawi Na Award) an pekmi cu mangbangza ngaingai a si. Ziangruangah tile General Min Aung Hlaing cu Kawlmi a si fawn, Chinmi silo hnen ih Chin Paralṭha Lawmman pek cu ziangruangah si pei? Tiah mipi khawruahnak a ti hnok zet.

Myanmar ralkap bawi general Min Aung Hlaing hi tubaite ah kan unau a simi Kachin pawl catbanglo in an cimit ṭheh ding duh ih kap rerotu a si. Chinram sung, Paletwa peng Chinram sung rori ah AA le cozah ralkap doawknak nasa tak um ruangah Chin mipi ziang maw zat ei-in harsa le umnak neilo mangbang anhai an umlai ah, zianghman ih siarlotu an si fawn. Culak lai ah hivekin Chin Paralṭha Lawmman an vun pek cu khawruah har mangbangza rori a tling ban a si.

Credit: Zalen