Ton Zang Myo-ne Ah Pangang Rawl Kung An Cing Sal Ding

Rawl cin thlak lam hotu U Hla Kyaw cun Chin State, Ton Zang myo-ne ih pangang zuatnak tuah ṭhat sal nak dingin pangang rawl kung cin ding le pangang zuat dan training, pangang pawl zuar suah a si thei nak ding khua ruatin ram sung ram leng ihsin sumpai ih ṭuan theitu pawl sawmin hna ṭuan sal a si ding thu a rel.

Hi thu hi tu ih Pyithu Hluttaw an to rero lai, September 11 ni ah khan Ton Zang myo-ne ih si an hrilmi U Kham Khan Thang in Ton Zang myo-ne sungih pangang zuat thu thawi pehpar aw in cozahin ziang vek timtuahnak so a neih, paisa ret mi, fimthiamnak lam le a market lam bawmnak a um thei pei maw, tiah thu suhnak a tuah cu U Hla Kyaw in a lehmi a si.

U Hla Kyaw cun hitin a rel: “Pangang rawl kung cin ih pangang zuat le pangang thilri pawl ṭuan suah a si theinak dingin sumpai kan hmuh dan danin fimthiamnak lam le bawmnak lam kan ṭuan vivo lai. Pangang zuat dan tla training pek a siih, a ti dan ding thar (thiamnak thar vivo) hmangin tui hlan hnakih tam ṭuan suah a si thei nak dingin, nathrik le boruak thleng aw vivo kha tuar thei ding pangang ci pawl zem an si ding. A hmunhma ih ṭuantu ding pawl thawn bawmawk khawm a ṭul zik ih ruangah ram sung/leng ihsin investment tuah dingin kan sawm hai ding. A market hnget khauh takih a um theinak ding hrang ram sungih hnaṭuantu pawl thawn kan peh tlai-aw ding,” a ti.

Lai tlang hi pangang zuat ih pursumnak tuahnak hmun ṭha zet a si. Ton Zang myo-ne khalah hin pangang zuatnak tuah ṭhat sal a si theinak ding, pangang zuatnak a hung ṭhanso thei nak ding, a mai tikcu milih ṭha tei zuar suah a si theinak dingih pangang thilri zuarnak tuahsak ding thu le pangang ihsi tuahmi fibre pawl Auto ih tuahnak, cozah in bun sak ding a si thu tla, U Hla Kyaw cun a rel. Tu ah hin Ton Zang myo-ne ah pangang zuat dan le pangang rawl kung cin dan lam training cu an tuah rero lai thu theih a si.

Tui hlan, 1960 hnu lam ihsi khan Ton Zang myo-ne ah hin pangang rawl kung an rak cing ih, pangang zuat cu sungkua cawm-awknak bikah an rak hmang. Asinan, pangang ih tuahmi silk (fibre) pawl cu a leitu lam ihsi duh duh ih an control ruangah a ṭuantu pawlin harnak an tong ih, an pum cawmnak bik pangang zuat cu ṭuan thei loin tu tiang an um phah. 1962 ihsin an rak ṭuan thok ih 1979 tiang nasa takin an rak ṭuan. Cui hnu cu pursumnak ngai ngai in an ṭuan thei nawn lo. Pangang ihsi sumpai hawl an colhsan hi tu hin kum 40 lai a ti zo.

Be the first to comment

Leave a Reply

Your email address will not be published.


*