Tuini ih kan Chinram uk beh tumtu pawl khalin hihi an ruah dan a si

Curuangah, hriamhrei hmangin thazang cahnak thawn kan do let tikah annih cun in hua zet ding nan khatlamah an lung sung taktak ahcun an tlukpi minung ah in ruat phah fawn ding. Cutikah, a dik mi le thutak cu kinlan (cabuai) parah relpi an duh phah thei; annih le kannih karlak ih thubuai khal daiten in relpi duh phah thei fawn. Hiti a si tikah tawng dangih kan sim asile, hriamhrei thawi tui Chin pawlih kan doral kan do let tikah anmah (Kawl cozah) lala hrangah thatnak kan tuah tluk a siih fimnak kan pe tluk a si. Khatlamah, Chin pawlin hnam damnak kan hmuh phah theinak lamzin a si fawn.

Hriamhrei rinsan ih leitlun pumpi uk tumtu Hitler kha hriamhrei lala hmangin Mirang (England), America ti pawlin do let lo sehla leitlun pumpi in ziang vekin retheihnak kan tuar ding ti cu rel ngam hman a si lo; Israel hnam pawl hrang tla ahcun damnak ding lamzin a um nawn lo men ding. Hitler kha India hotu Gandhi in a nemzawng (ahimsa) in do sehla India ih Kalapawl cu mithahnak tur inpi (gas chamber) sungah an lut thluh men ding. Curuangah, lungtum khuainak ahcun sobul hman a tul, buh atnak ah favah hman a tul ih kan ram hnamdang kut ihsin lasuak dingah hriamhrei kan hman a tul.

Asile, hriamhrei cu tui raldonak ding lawngah kan tul tinak a si maw? Si hlah. Taktak ahcun mi ram uktu phunhnam hrekkhat (thimnakah British pawl) tla cu a nemzawng ih duh nak relpi theih an siih thahrum hman tulloin zalennak khal mi an pe sal (e.g. India) ti kan hmu. Hivek pawl hnen ahcun thahrum hman rero hi thil tul a silo. Tui in uk tumtu hnamdang cozah khalin thahrum hman tulloin kan zalennak hi in pawmpi ih in ti buai lo asiahcun kannih in thahrum kan hman ih kan do rero a tulnak a um lo. Asinan, cuti a silo ruangah kan hmang rero cu a si meiih, thusutnak um thei mi cu zumlopi in thimnakah Kawl cozah in daiten kan zalennak hi pawm in in uk tum nawn lo sehla kan ralthuampawl cu khuiah kan ret dingih kan hmang ding, tihi a si.

Hnam pakhat siin ram pakhat neitu kan si kulh sung le hi leitlun minungpawl kan thih hloh thluh hlan kulh sung le Setan in minung pawl hnen ih hna a tuan thei kulh sung cu zalennak kan hmuh hnu khalah hriamhrei cu kilvenawknak ah kan tul ringring ding. Kilvenawknak kan neih that poh le kan ram ah daihnak a um ding. Kilvengaw thei lo kan siahcun tui kan dinhmun bangin thin le ham kaiaw loin thinphang le rethei fialfial in daihnak hnangamnak nei loin kan um ringring ding. Curuangah, daihnak le thansohnak thlentu le minung pitling si thei dingah hriamhrei cu kan tul ringring ding mi a si. Hihi midang va uk tumnak le va hmuhsuam tumnak le mi ram va nawrnak ih kanhman lo hnuhnu cun a dik le a thiang mi a si.