Vawiin tana Chanchin Langsar Zualte

1. Myit Sung Hydro Project

Naypyidaw a an neih Invest Myanmar Summit 2019 ah Myitsung Hydro Project pawh an sawiho va. Foreign investment lam mawhphurhna latu U Thawng Thun-a chuan, he Hydro project hi sorkar chuan mumal deuh taka chinfel dan a ngaihtuah mêk a ni a ti.
Myit Sung Hydro Electric Project hi a chelhtu bik commission an awm a. Engtin nge commission-in a tih dawn erawh a la chiang chiah lo. Tuikhuah tih tet deuh emaw, hmun dang deuha sawn emaw a ni thei a ni,” U Thawng Thun-an a ti a ni.

Sorkar hmasa hunah khan he project hi tihtawp lai lawk a ni a. Tun sorkar kal lai hian a ennawn leh mêk a. Mipuiten an thlaphanpui hi ngaihthah ngawt chi a ni lo va. Lehlamah he luipui hi ram tan a hlu em em a, ram hmasawn nan power kan neih a tul hle bawk a ni, a ti.

He Myit Sung Project commission ah hian ram hruaitu leh thuneitu lawkte an awm a, commission-in an hmuhdan an rawn tarlan anga kalpui mai tur a nih a rinawm a. China nena inpawhna hi ngaih pawimawh a tul ve bawk a ni, a ti.

2. Shan State-ah Inkahna Thleng

Shan State chhaklam Tachileik khawpuia Akha bazarah Sumdawng hausa tak pakhat kahhlum a ni.

He pa, U Ar Phar @San Yar Phar hi nimin tlai 1:00 velah khan ama motor Cygnus var rawn khalhin bazar bula traffic point-ah a ding a. Chutia a din lai chuan mi pahnih motorbike rawn khalhin an rawn kap ta mai a ni tih a hmun hmutu Saing Aw chuan a sawi a ni.

U Aphar @ San Yar Phar hi Chinese mi, rangkachak khur nei, petrol leh company hrang hrang nei, pa hausa tak mai a ni a. Mi thil phal tak niin Tachileik leh a chhehvel mite chuan an hria a ni.
Tualthahna thubuai hi Tachileik policete chuan dan number (p) 50/2019 siamin tualthah case number 302/114 na angin file an siam a, an chhui nghal mek a ni.

3. North Korea Nuclear Siam Zel

North Korea chuan a nuclear program a chawlhsan mai mai dawn lo niin CIA chuan report a pe.

North Korea hruaitute chuan nuclear ralthuam neih hi an ram him nan a tul nia an hriat tlat thu CIA hotu hian a sawi.

CIA hian ram himna lam tiderthawng theitu chi hrang hrang tana hma an lak dante chu kum tin report an pe thin a. Tun hma deuha thawm nei tak Iran erawh chuan nuclear chung changah hmalakna thar, langsar leh lian tham a neih tawh hrih loh thu an report-ah a tel bawk. Chutih laiin firfiak pawl ISIS te chuan Syria, Iran leh khawvel hmun hrang hrangah sipai eng emaw zat neiin hma an la la nasa hle niin report a ni bawk.

Chutiang dinhmunah chuan President Trump-a chuan ISIS ho chu do rêma inngaiin a sipaite chu Syria ata a lo lakir ve thung a ni.

4. Venezuela A La Chiang Lo

Nicolas Maduro sorkar chu rin ai takin a buai chho mek zel a. Chutih laiin eptu pawl hotu Juan Guaido pawh ram chhuahsan lo turin Venezuela Ukil hotuber chuan sorkar court ah thu a thlen. Juan Guaido-a sum account zawng zawng pawh khar sak vek turin leh a chungchang chhui chiang turin a thlen bawk.
Juan Guaido erawh chuan Nicolas Maduro sorkar atangin engmah thil tha a beisei loh thu a sawi ve thung. An ni pahnih hi tun kar kaltaa Juan Guaido-an sorkar thar siam tura a beisei leh president nihna a chuh hnuah thuneihna kengkawhtu zawk nih tumin tan an la ve ve a ni.

US leh khawthlang ram tam tak chuan Juan Guaido-an sorkar thar siama president nihna a chuh lailawk chu an pawmpui a ni.

Ref: BBC, VOA.