ZIANGAH KAN TANGRUAL LO? Chinland Qua Vadis

Chin mipi hrekkhat in can tampi ah, “Chinpawl cu kan lungrual theilo tukih zianghman kan pitlin thei cuanglo ding, Kawl ralkap cu an tam tuk kan neh thei cuang lo ding; cozah pi neh a theih lo” an ti theu. An ti men lawngsiloin hihi an ruahdan le zumnak taktak khal a si.

Adam le Evi ih cithlah milai pawl kan zaten thiltha tuah dingah tang rualloin thil diklo le sual tuahnak ah kan tangrual ringring. A diklo le sual cu thaten ruat hmaisa loin kan pawm theuih a dik mi le thami riangri cu pawm le thlun harsa kan ti ringring. Evi ih thilsual tuahnak cu Adam in awlten a thlun ih a tuah ve.

Noah ih tilik thlen ding thudik a aupi rero mi cu mi tampiin zum duh lole thlun duh loin an um. Sâl tannak ihsin a hruaisuaktu Moses ih thu le ralthatnak thusimtu Joshua le Caleb ih thu hnakin tihhrutnak thusimtu mi 10 pawl thu cu Israel pawlin an zum deuh. Pathian fapa Jesuh le a thusimmi pawl cu thudik le thungai hlir a sinan an zumlo ih thinglamtah parah an kheng that.

Noah ih thudik aupi rero mi zumlotu pawl cu tilian in a cimral thluh. Moses, Joshua le Caleb ih ralthatnak le thudik an simmi zuamlotu pawl cu thlaler ramcar ah kum 40 sung vakin an thi hlo thluh. Jesui’ thuthangtha zumlotu pawl cun sanmureng siatralnak an tawng. Hivek thotho in hnam damnak thudik aupi rero mi zumlotu le thlun duh lotu pawl cu nungdam cingih hloral rero “hnam hlo” an si. Lamzin pahnih lawng a um: hnam damnak thuthangtha le hnam siatralnak thuthangsia. Chin pawlih hmailam dinhmun cu himi lamzin pahnih ah khui deuh kan zawh timi parah a thumaw.

A thalomi le diklomi zumtu le thluntu an tam sawn ruangah a tha le dik zum ih thluntu pawl hrangah hmakhaw pihnak le siatralnak lawng a um tinak a si lo. Noah ih thu zumtu mi malte ihsin tuini tiang minung siar cawk lo dam in kan um phah. Moses, Joshua le Caleb ih thu zumlotu pawl cu an siatral thluh nan Joshua ho in Pathian ram tiam cu Israel pawlin an luah thotho.

Beidawnnak le thanaunak thusimtu pawl le tihhrutnak thu aupitu pawl ruangah thanau ding a silo. Thiltha tuah khal thulh ding a silo. Tan lak sinsin ding a si sawn. Thazang ngahnak ih hman thiam ding a si sawn. Ziangahtile a sia cu a tha in a neh ringring ding, thu diklo cu thudik in a neh ringring dingih thim cu eng in a neh ringring ding.

Leitlun khui ram hmanah hivek hnam damnak le zalennak an tuan laiah an zaten lungrual zetin an tangrual thluh dah lo. Mi hek hmang, mi zuar hmang, ral lam tangih cangvai, mai hnam hotu sawisel ih do, kan neh cuang lo ding tiih thanaunak lawnglawng sim, remawklonak thu le hla lawnglawng hawlih tuah, hotu le sinak lawng cuh ih buaipi, mi tuah cia le tuan cia mi rak sawisel rero lawng thiam, mai hlawknak le larnak lawng ruatih a harmi cu tuan paih taktak lo, mi tuansuah cia mi cu mai tuan suahmi vekih rel le aupi rerotu, ti pawl cu an um ringring.