Ziaza Tha An Neihtheinak Dingah Tithiang An Zem

Russia, Tver Myo sung ih fala tlangval pawl in ziaza țhate anneihtheinak dingah tin Russian Orthodox Church ih Father Alexander Goryachev in van tidai thiangte a zem. Ziaza tha anneihtheinak ding ih thupi hmaisabik cu zu rit loh a sih ruangah zu phiatnak ding ti khal in sim a ngah.

Fala tlangval pawl nun siatsuahtu bik cu zu le Drugs a sihruangah cu cu an phiat thei pangah tin Father cun thahnem hmarngaiten sunvu a zem. Tver Myo sung longah 70 liters a zem, rak nuihsan meitu khal an umko, sinan Father hin a thiltuah mi hi an mino pawl hrang thiltha a si ti a fiang, a ning a zak lo.

Vandai tithiang a zemnak khuat khal ah an biak inn sung ih an hman mi mei mei a hmang lo. 19th Century sanlaita khuat thawn vandai tithiang cu fala tlangval lakah a zem, tin Tver-News cun a ngan. Ziangah tile hi ti a in tu pawl khal in thinlung takten an in ih thil thalo an hiarnak pawl an hlawn theinak dingah ti tumtahnak thawn a si.

Kan ram Pastor le Evangelist vek ih Pulpit par in nasazet ih thusim vak vak silo in a tak rori in a fehsuakpi tin sim sehla kan sim sual lem lo ding. Zu tama le sii tama in an nun an thleng theinak dingah tin thlacamnak thawn vandai tithiang ( ruahti ) cu a zem in a zem rori a si. Lei ihsin suak mi ti silo in van ihsin ra suak mi, lei thleng rihlo mi pawl cu 70 liters cem tiang a zem.

Laimi lawng hi zu ruang ih buai kan silo ti a fiang ngai ngai. Zuri pawl ih thil tuah duhmi le rilo pawl ih thil tuah duhmi cu an bangaw thei lo. Zurit loh ih kan tuah duhloh mi tampi cu zu kan rit ah cun ka tuah duh leh zel mei a si. Cutik ah kan rit loh hnutiang a rak poi ticu kan rit loh hnu ah kan thei sal. Cu cu ram le miphun hrang siatralnak pakhat a si. Tver-News

Be the first to comment

Leave a Reply

Your email address will not be published.


*