Zirlai Tlawngtapawl ih zawnruah zangfahnak ruangah Zirhtu (Saya) cu Dan rual loin a mitthli a tla; Video

Tlawng Ca Zirhtu (Saya) ṭuan hi thil harsa zet a si tlunah duhthusam tlin har zetmi hnaṭuan a si. Innsung sang dangdang, nulepa dangdang, hmun dangdang ihsi a ra suakkhawmmi nauhakpawl zoh enkawl ih ca zirh asi tikah mi naraan men ih ṭuan theih ding ci a rak si lo. Vei tampi thinheng nohno can a um vekin acancan ah lungawi can khal a rak um ve.

Ṭhen khat Zirhtu saya cu miṭha zet an si rualrual ih hrekkhat Zirhtu saya pawl cu mi ṭhalo ngaingai, an zirhmi tlawngtapawl khal Ca thiam dingin le fim dingin kilkhawi loin ka hnaṭuan ka cii pam tiin duhdah takin an zirh ih ṭhaten an kilkhawi fawn lo. Zirhtu Saya hin zirhmi Tlawngta lak khalah duh bul le huat bul neih hi a ṭhalo zetmi a si.

Zirhtu (Saya/Sayamah) si ruangih zirhmi tlawngta pawl vuak ṭheu, kok ṭheu, hmuhsuam, duat bul le huat bul nei tivek ih ṭhatlo dan tla cu, nauhak an hung upat ih sinak sang taktak an hun neih tikah ahlan ih a rak zirhtu ṭihzah ih upat hnak hman in, I rak zoh setu, I rak hmuhsuamtu tiih phuba lak duhnak hman a suak theimi a si. Curuangah Tlawng Zirhtu (Saya/Sayamah) ṭuan timi hi hlawhman ka ngan takah tivek men ih ṭuan ding ci a rak si lo lawlaw.

Tuiṭum ih kan tarlang dingmi hi mi thinlung tham zet le hi Video a rak zohtu mipi mitthli tlater thu a si. Tlawng Zirhtu (Saya) pakhat, thla 2 sung rori thlahlawh dawnglo saya pakhat cu a zirhmi tlawngta nauhak pawl cun anmahte sumpai khawngaw in, an sayapa laksawng an pe ta riai. Hihin an sayapa cu dan rualloin a mitthli a tla ter ih a lungawinak hi Facebook ah tarlang in a hmutu mipi pawl khalin tlawngta pawl an fak ih an lawm zet.

Runo Rafael Paica timi Saya pakhat cu thla 2 sung rori thlahlawh ngahlo ih a um tikah minung sinak in thinharnak nasa tak a nei ih, hnaṭuan suak hman a rak tum vohvo. Asinan Runo Rafael Paica ih nun cawntlak zetmi cu, hivek thinharnak tong hman sehla a tlawngta pawl hmaisa mithmai sia in siseh, a tlawngta pawl par khalah siseh zirh paihlonak thinlung nei riai loin a um.

Zing khat cu tlawng khan sung a vung lut ih a tlawngta pawl cun sayapa sangka ih benmi Ca kha siar aw an rak tiih a va siar sal. Cun tlawngta pakhat hnu pakhat ih an Cangan mi cu an siar ter ih a siarsak vivo. Cutin amai’ tonak lam pan in a fehih a dawhkan (cabuai) parah box fate a um ih cumi sung a vun zoh cu, a khat in paisa fai a rak um ṭhelṭhel.

Cucun an sayapa cun a tlawngtapawl in an duhdawt zia le a tlawngta pawlin a hrangih an thiltuahmi pawl a theisuak, dan rualloin a mitthli a tla, a tlawngta pawl hmai ah a dingih supaw theiloin a ṭap. A tlawngtapawl cun an pan vialvo ih an sayapa cu an pawm.

Zir dingmi; Tlawng Ca zirhtu (Saya/Sayamah) pawl hi mi thupi tuk an si ruangah, an zirhmi tlawngta nauhak kha, nautat le hmuhsuam men loin, duh bul le huat bul umloin, mitkem bul le duhbik cuang umloin bangran ten zoh thiam ding hi a thupi tuk. A thoknak lam ih ngan zo bangin, “kan zirhmi tlawngta pawl hi an hung upat tikih sibawi sangsang maw, asilole hnaṭuan sang pipi an neih tikah ningzak ih na um lonak dingin, thei tawkin na zirhmi tlawngta pawl parah ṭhat na suah rori a ṭul”, a si.

Video rak zoh ve aw;

Video a lang theilo pang asile, screen parah hmet awla a ra langcih mei ding.